Ministru Negósiu Estranjeiru Kooperasaun (MNEK), Dionísio Babo Soares hateten, membru governu sira reuniaun halo ba aprezentasaun no aprovasaun ba planu ezekusaun balun husi ministériu balun inklui Gabinete Primeiru Ministru no Sentru Integradu Jestaun krize (SIJK) Ministériu Transporte Komunikasaun (MTK) Ministériu Turizmu Komérsiu Indústria (MTKI), no Sentru Lojístika Nasionál (CLN) Ministériu Defeza no Interiór, Ministériu Saúde.
Alende ne’e, iha apresiasaun sei haree tuir orsamentu sira ne'ebé hala'o ona diskusaun ho diretór nasionál, forsa, no PNTL hodi filtra proposta ne'ebé hatama atu bele la’o tuir Lei Númeru 12/2020, ne'ebé Parlamentu Nasionál hasai ho regra implementador husi fundu Covid-19 ne’e rasik.
“Ita-boot sira hatene lei hateten katak, kualkér proposta ne'ebé halo tenke iha relasaun direita ho Covid-19, bainhira ministériu aprova hotu ona rekizitu sira ne’e klaru ona Konsellu Jestaun sei reuni fali dala ida aprova hodi bele halo pagamentu”, dehan Dionísio, Ministériu Finansas, Ai-Tarak Laran, horisehik.
Governante ne’e dehan, ministériu ida-idak hala’o nia atividade mesak hanesan sentru jestaun krize nian, mahon iha Gabinete Primeiru Ministru nia servisu espesífiku mak halo ba kontrolu no mós analiza produsaun desizaun polítika kona-ba Covid ne’e rasik.
Alende ba parte Ministériu Defeza Seguransa sira-nia ema ne'ebé servisu frontline, ligasaun ho protesaun maskra, no ministériu sira seluk, hanesan MTKI, halo pagamentu kuarentena, otél, hahán ba ema sira ne'ebé tama kuarentena, no sentru lojístika nasionál nia haree kona ba stock foos atu garantia ba fulan tolu nian.
“Proposta sira ne’e ami haree fali pontu sira ne’ebé hanoin filtra atu kumpre loloos lei ne'ebé iha”, tenik nia.
Babo realsa, iha diskusaun ne’e mós hateten, ministériu hotu-hotu hakarak sosa artigu saúde hanesan maskra, roupa, luvas no buat hirak ne’e iha hotu ministériu saúde nian ne'ebé akizisaun hotu ona, nune’e ba de'it ministériu saúde nune’e ida-idak labele sosa rasik fali ninian.
“Planu no programasaun sira haree atu filtra hotu kedan nune’e despeza sira seluk bele selu rotina husi ministériu sira nian atu labele halai ba fundu Covid, hanesan materiál eskritóriu, gazolina la’ós Covid tanba hola parte iha bens servisu ministériu ida-idak nian ne'ebé iha osan duadesimu bele ka fundu liuhusi fundu seluk, maibé liuhusi ministériu seluk hodi aprovasaun” tenik nia
Nia espresa katak, buat ida-di'ak husu Fundu Covid ne’e mak laiha restituisaun kona-ba montante hira iha mudansa kategoria, tanba iha natureza emerjénsia nune’e bele muda de'it akomoda situasaun ne'ebé mosu daudaun.
