Nia dehan, bainhira bankada tolu la hatudu prova ruma, maka laiha razaun destitui Prezidente Parlamentu Nasionál, Arão Noé de Jesus da Costa Amaral.

Nia esplika, alterasaun ba rejimentu Parlamentu Nasionál iha tinan 2016, III Lejizlatura iha artigu 20 ba artigu 16-A, no 16-B, hodi rejimentu fó dalan halo destituisaun ba Prezidente Parlamentu Nasionál, maibé antes ne’e rejimentu la fó dalan.

“Ida ne’e mak fó dalan atu halo destituisaun mais iha ne’ebá iha regra kompletu atu ko’alia kona-ba prosesu oinsá mak atu bele halo destituisaun ba meza-Parlamentu,”dehan nia.

Maibé, tuir Vise Presidente Bankada CNRT ne’e dehan, Presidente Parlamentu Nasionál seidauk viola rejimentu parlamentu ou Konstituisaun KRDTL.

Iha fulan kotuk líder Bankada sira deside tiha ona bainhira, laiha Ordem do Dia la presiza plenária.

Tanba ne’e, Prezidente Parlamentu Nasionál iha direitu tomak no totál atu estuda hodi haree katak rekerimentu ne’e iha ninia bazé fundamentál ruma ka lae.

“Sé iha baze fundamentál ruma prezidente sei estuda, haree no depois fó resposta mas sé laiha baze fundamentál ruma di’ak liu prezidente rezeita tiha, indefere tiha de’it rekerimentu ida-ne’e,”katak nia.

TUir nia katak, situasaun politika atual iha Parlamentu Nasionál difereNte ho situasaun iha tinan 2017.

“Iha 2017 bainhira deputadu sira husi Aliansa Mudansa ba Progresu (AMP) hatama rekerimentu ba Aniceto Guterres hanesan Prezidente Parlamentu, hodi husu destitui tanba baze fundamentál mak Governu Minoritaria iha VII Governu, ne’ebé ke la prienxe rekezitu konstitusionál,”dehan nia.

Maibé Prezidente Repúblika obriga tenke forma Governu ida ke la hetan viabilizasaun husi Parlamentu Nasionál, faktu mak governu nia programa no orsamentu retifikativu rezeitadu hodi rezulta Governu monu maibé lakohi simu realidade.

Entaun deputadu sira hatama pedidu mosaun sensura maibé momentu ne’ebá Prezidente Parlamentu, Aniceto Guterres la ajenda ida ne’e.

Nia  akresenta, ohin loron VIII Governu ne’e prienxe rekezitu konstitusionál, ne’ebé CNRT mak hahoris tanba meza-Parlamentu refleta ba Governu ida Aliansa Mudansa ba Progresu, maibé iha 20 Janeiru 2020 orsamentu xumba tiha, hatudu katak parlamentu ne’e lakon ona nia konfiansa ba Governu.

Tanba Governu ne’e la hetan ona lejitimidade polítika, kompeténsia Prezidente Parlamentu nian atu demite Governu.

Tanba ne’e, tuir nia katak, Bankada tolu laiha fatin atu halo destituisaun ba meza parlamentu.