“Governu nee kompromete-án tomak atu asegura katak ami nia bensa nee sai nuudar fonte oportunidade no sei la nakfilak ba maldisaun,”dehan Primeiru Ministru Taur Matan Ruak iha diskursu Simeira Internasional Dahuluk kona-ba Petróleu no Gás iha CCD,horisehik.

Maski nunee, nia dehan, susesu iha kumprimentu mandatu konstitusionál ezije katak, Governu servisu hamutuk no besik liu ho investidór sira, hodi dada empreza foun, inisiativa no parseria sira dezenvolvimentu nian.

Governante nee dehan, Kooperasaun durante tempu naruk entre Timor-Leste no empreza internasionál sira hanesan ConocoPhillips no nia Asosiada sira iha operasaun petrolífera iha kampu produsaun Bayu Undan nian, daudaun nee, no iha kampu EKKN (Elang-Kakatua-Kakatua North) iha tempu liubá, ho Eni SpA no nia Asosiada sira iha operasaun petrolífera iha kampu Kitan, no Woodside Energy no nia Asosiada sira daudaun nee, no mós ho empreza sira esplorasaun nian iha tempu liubá no daudaun nee, estabelese ona baze ida-neebé diak ba dezenvolvimentu indústria petrolífera iha Timor-Leste.