“Semana oin Governu sei nomeia ekipa mista independente ida investiga”, dehan Primeiru Ministru (PM), Rui Maria da Araújo, iha Igreja Katedrál-Dili, Sábadu (1/4).

Ekipa ne’e kria atu halo investigasaun profunda atu funda liu faktu ne’ebé la’o daudauk iha ospitál.

Xefe Governu mós orienta ona ministériu saúde hodi haree buka solusaun imediata ba problema ne’ebé akontese iha ospitál nasionál.

Iha fatin ketak, vise ministra saúde, Ana Maria Soares hateten, Konsellu Ministru foti ona desizaun hasoru dirijente balun iha ministériu relevante, tanba halo komentáriu iha média sosiál menghasut fali lideransa iha MS laran.

“Desizaun iha Konsellu Ministru iha ona atu halo prosesu investigasaun, ne’ebé profisionál saúde sira ne’e ita lori tan imajen para atu hatún lesuk ita nia governante sira”, tenik nia.

Ana afirma, ne’e halo demais tanba la respeitu no konsidera profisaun ida de’it. Ema laran mak trata uluk, iha ema seluk nia oin, entaun públiku ataka tuir sira nia hakarak.

Problema iha HNGV mosu hafoin pesoál saúde ida publika iha média sosiál kona-ba ai-moruk atu halo operasaun ba pasiente laiha. Nune’e ikus mai hamosu dezentendimentu entre ministériu saúde no pesoál sira ne’e rasik.