Liu husi ninia omilia, Bispu Dioseze Dili, Don Virgílio do Carmo da Silva hateten, hotu-hotu mai agradese ba Na’i Maromak, ba sá, liu husi nia povu hili ona atan Francisco Guterres ‘Lu-Olo’ hodi sai aman ba nasaun no povu ida ne’e.
“Bolu ita nia atensaun nunka se kole, hodi halo aan simples hodi kontinua deskobre Na’i Maromak nia hakarak”, dehan nia, iha Igreja Katedrál Dili, Sababu (1/4).
Amu Virgílio esplika, agradese la’ós simplesmente esperansa ida, maibé atitude komportamentu karakter ema ida nian.
Ne’e duni, agradesimentu ne’e hanesan konversaun husi ida uluk la fiar ba fiar, tanba grasa Na’i Maromak nian tun mai atu multiplika família, instituisaun, uma kreda, no mós nasaun hodi kontinua hala’o transformasaun husi duvida inserteza ba serteza no naroman unidade. Ne’e mak ema hotu nia misaun nu’udar ema sarani.
Hafoin santa misa, futuru Prezidente Repúblika Francisco Guterres ‘Lú-Olo’ hateten, misa agradesimentu ne’e halo reflesaun ho família tomak, família Partidu FRETILIN no komunidade, inklui sarani sira hotu.
Misa agradesimentu ne’e hakarak atu lembra fali marxa pás ne'ebé hala’o molok tama ba kampaña eleitorál eleisaun prezidensiál períodu 2017-2022.
Nia dehan, misa ne’e atu agradese ba sarani sira hotu ne'ebé hamutuk kandidatu sira hotu hodi lori pás no dame ba prosesu ne’e to’o remata.
Misa ne’e atu husu nafatin Maromak bele fó naroman ba nia (Francisco) no ba povu tomak, inklui ukun na’in sira tomak durante servisu liman nia laran.
“Husu nafatin roman… lori ita nia rai ida ne’e ba nafatin dalan pás, hakmatek no dame ninian”, dehan Lú-Olo.
Misa agradesimentu ne’e partisipa husi kuadru FRETILIN, veteranu inklui partidu sira ne’ebé durante ne’e apoiu hanesan CNRT, UNDERTIM, PEP no C-ASDT.
Hafoin misa ba tau ai-funan iha Jardín Herois da Pátria Metinaru hodi fó onra no agradesimentu ba eroi sira.
Antes ne’e, futuru prezidente repúblika liu husi ninia karta ofisial fó agradesimentu ba komponente hotu-hotu ne’ebé envolve iha prosesu sufrájiu ida hodi deside sira ninia prezidente repúblika.
Iha karta ne’e Lú-Olo hateten, prosesu eleisaun prezidensiál hodi hili Prezidente Repúblika RDTL 2017-2022 to’o ona ba rohan, hafoin tribunál proklama prosesu eleisaun la'o di'ak, pás no hakmatek.
“Prosesu eleisaun la’o tuir kalendáriu no susesu tanba liu husi oportunidade ne’e ha'u hakarak hato'o agradesimentu ba órgaun Estadu ne’ebé fó apoiu tomak ba susesu eleisaun prezidensiál, liuliu ba órgaun eleitorál hanesan CNE no STAE ne’ebé organiza hala'o sira ninia servisu ne’ebé todan no sira hala'o sira nia knaar ho di'ak,” tenik nia.
La haluha hato’o agradesimentu ba Partidu FRETILIN, Partidu polítiku hanesan CNRT, UNDERTIM, C-ASDT, PEP no mós konfisoens relijioza sira hanesan igreja Katólika ne'ebé fó mensajen ba povu hodi ezerse povu nia direitu ho pás no hakmatek.
Agradese ba povu tomak ne’ebé hatudu maturidade no sivizmu aas tebes ne’ebé hatudu liu husi kampaña pás no hakmatek. Ezerse funsaun liu husi votu ne’ebé sira hato'o iha loron votasaun no mós konfiansa ne'ebé depozita ba ha'u.
Hato’o mós ba veteranu individuál no grupu profisionál ne’ebé fó apoiu tomak ba ninia kandidatura. Agradese mós ba sosiedade sivíl liu husi FONGTIL ne’ebé hato'o kongratulasaun. Ba média nasionál no internasionál no média interna ne’ebé halo kobertura ba prosesu eleisaun tomak.
