Hanesan publiku hatene, iha semana kotuk bainhira halo dialogu ho komunidade Vikeke, PR Lu Olo hasai lia-husu kona-ba fontes orsamentu ne'ebé governu sei uza hodi dada kadoras.
Ba lia-husu ne'e, PM Taur dehan governu sei la foti osan husi fundu minarai atu dada kadoras mai TL.
“Ha'u ohin informa ba Prezidente Repúblika katak governu ninia esforsu halo ne'ebé ita labele foti osan husi fundu petrolífeiru, ba (dada) kadoras nian ne'e bele foti iha fatin seluk, Purezemplu kazu agora $930 miloens ba portu ne'e la foti fundu (petrolífeiru) ita foti iha fatin seluk ne'ebé ita sei selu fila fali obra rasik, obra ne'ebé projetu ne'ebé la'o hanesan fa'an mina selu fali ida ne'e,” dehan PM Taur ba jornalista sira sira hafoin enkontru semanál ho PR Lu Olo iha Palásiu Prezidensiál Bairu-Pite, Kinta (02/5).
Atu impresta orsamentu, Xefe Governu ne'e dehan, Timor Gap nu'udar empreza estadu nian mak lidera prosesu negosiu ida ne'e ho kompañia sira seluk ne'ebé TL joint ho sira.
Kona-ba relatóriu husi ekipa negosiadór ba sosa asaun ConocoPhillips no Shell Energy, PM Taur hatete, sosa asaun Conoco-Shell ne'e konklui no sei iha tempu atu prepara relatoriu no aprezenta.
“Maibé ha'u akompañia nafatin situasaun ida ne'e nafatin iha Ministéiru tutela ne’ebé atualmente Ministru Estadu Konsellu Ministru nia mak tutela ba Ministériu Petroleu no Rekursu Minerais, portantu halo akompañamentu kontinuamentu nafatin ba prosesu ida ne’e."
Ba deklarasaun husi PR Lu Olo ne'ebé seidauk simu relatoriu ofisial husi governu kona-ba sosa asaun Conoco-Shell, PM Taur hatete, sira sei reuni informasaun hotu-hotu atu bele fasilita no aprezenta ba Prezidente Repúblika.
“Ha'u mós simu husi Prezidente Repúblika kona-ba preokupasaun sira ne’e mós,” katak nia.
