Deklarasaun Prezidente PN ne'e kontrariu ho nia deklarasaun ne'ebé nia fó sai ona antes.

Iha intervista ho jornalista sira hafoin hasoru-malu ho Prezidente Repúblika iha Palasiu Prezidensiál, Arão hatete, PN sei sosa prado foun ba deputadu sira.

Maibé, iha Kinta (02/04), Prezidente PN ne'e deklara fali katak, nia seidauk hatene modelu karreta ne’ebé sei sosa ba deputadu sira.

“Ha'u mós to'o agora la hatene karreta ho medelu saida mak atu sosa tanba CNA (Komisaun Nasional Aprovizionamentu) seidauk informa mai PN”, dehan nia ba jornalista sira iha PN, Kinta (02/05).

Tanba, prezidente PN ne'e fó razaun katak, atu sosa karreta ne'e depende ba kalkulasaun orsamentu ne'ebé PN prevee.

 Signifika, nia hatutan, CNA mak sei halo kalkulasaun hafoin informa ba PN kona-ba modelu karreta ne'ebé sei sosa.

"Espera meadu fulan Maiu ne'e bele iha ona desizaun ka informasaun husi CNA."

Tuir nia, PN deside sosa karreta foun tanba durante ne'e deputadu sira sei uza karreta privadu hodi hala'o serbisu.

Ba deputadu sira ne'ebé uza karreta privadu, nia hatutan, PN oferese senhas kombustivel.

"Ho politika ida tenke hatama dokumentu karreta privadu inklui xapa matrikula par bele garante deputadu sira bainhira ba enxe konbustivel iha estasaun sira," dehan Arão.