Nia dehan, iha solusaun rua ne'ebé governu bele foti. Ida mak foti medida apoiu direita ba sidadaun no trabaladór setor privadu sira ka bele apoiu empreza hodi selu sira-nia funsionariu.

Ida seluk mak buka mekanizmu kreditu ho taxa kiik ba empreza hodi rekopera sira-nia ekonomia bainhira situasaun la'o normal fila fali.

“Empreza sira rekopera fila fali sira nia kondisaun, fó fila fali serbisu ba sidadaun sira, ida ne’e konkretamente preparadu ona maibé sei dezenvolve hela,” dehan Ministru Fidelis, iha salaun TradeInvest, Kolmera, Segunda (30/03).

Nia dehan, ministériu relevante sira hala'o ona enkontru ho Banku Sentral hodi haree ba asuntu ne'e.

"Dekretu governu loke dalan atu apoiu sidadaun no trabaladór sira maibé halo kalkulu envolve kustu boot nune’e bele hanoin oinsa atu bele iha maibé importante rekopera ekonomia,” dehan Fidelis.

Iha semana hirak oin mai, Fidelis hatete, sei haree oinsa atu orienta emprezariu no trabaladór sira iha sistema nune'e governu bele halo intervensaun no apoiu.

Molok ne'e, Ministra Finansas interina Sara Lobo Brites hatete, governu hakarak asegura seitor privadu sira atu kontinua selu sira-nia funsionariu durante estadu emerjensia, maibé presiza mós apoiu husi Parlamentu Nasionál.

"Se ita iha situasaun defisil hanoin atu halo intervensaun ba ekonomia seitor privadu sira importante, tanba ita hakarak asegura katak seitor privadu sira kontinua selu sira-nia funsionariu embora governu dekreta ona estadu emerjensia, maibé seitor privadu sira atu halo ida ne'e presiza mós apoiu husi governu," dehan ministra Sara hafoin reuniaun Konsellu Ministru iha Sentru Konvensaun Dili, Sabadu (28/03).

Tanba ne'e, nia hatete, governu aprezenta ona orsamentu hamutuk millaun $100 ba Parlamentu Nasionál, ne'ebé inklui mós osan atu apoiu setor privadu sira.

"Tanba ne'e pakote ne'ebé ohin entrega (ba PN) inklui ona hanoin balun atu halo intervensaun ho forma ida hanesan ne'e," dehan ministra ne'e.

Nia afirma, governu iha hanoin atu halo intervensaun ba ekonomia seitor privadu sira hodi bele kontinua selu sira-nia funsionariu, maibé depende ba parlamentu nasional aseita ka lae.

"Atu halo intervensaun ba ekonomia seitor privadu sira, primeiru hato'o lai ba parlamentu nasional aprova tiha lai osan, tanba laiha osan governu labele halo buat ida, tanba ita iha duadesimu, se parlamentu nasional aprova konserteza ninia implementasaun ne'e governu ho banku sentral tenke defini oinsa atu implementa," dehan nia.