Deputadu Pedro da Costa hateten, funsionáriu públiku sira ne'ebé durante ne’e hala’o servisu iha instituisaun Estadu tuir teste pelumenus tenke hatene inu nasionál foin bele pasa ba faze seluk atu kompleta sai funsionáriu públiku.

Nia hatutan, instituisaun governu balun halo serimónia ruma kuandu kanta inu nasionál balun kanta funsionáriu balun sempre kanta sala, ne’e signifika seidauk hatudu nasionalidade loloos hanesan sidadaun ne'ebé pertense nasaun ne’e nian.

La'o ne’e de’it, marxa inu nasionál mós seidauk uniforme didi'ak, tanba ne’e durante iha serimónia ruma toka inu nasionál tuir ritmu ida-idak ninian.

“ita labele toka no kanta inu nasionál pátria-pátria konforme ita nia hakarak ka tuir instituisaun ida nia hakarak”, dehan Pedro, iha Uma Fukun PN, horisehik.

La prioritiza Dada Bandeira

Iha ona regulamentu husi Komisaun Funsaun Publika katak kada segunda instituisaun hotu-hotu tenke dada bandeira antes tama servisu, maibé balun seidauk realiza tanba ne’e presiza haree hodi fó instrusaun ba instituisaun sira ne'ebé la halo tuir regulamentu ne’e.

Nune’e, iha instituisaun balun ne'ebé oras ne’e daudaun implementa ona dada bandeira nasionál maibé funsionáriu públiku sira la partisipa ativu. Sira barak hamriik iha portaun oin hodi la tuir formatura hasae bandeira nasionál.

Ne’e duni, husu ba komisaun funsaun públiku atu haree no halo inspesaun ba sira ne'ebé seidauk bele realiza dada bandeira nasionál kada segunda no ministériu sira tenke kontrola funsionáriu sira ne'ebé tarde la partisipa dada sa’e bandeira nasionál tenke fó sansaun.