Deklarasaun husi JSMP ne’e relasiona ho rezolusaun númeru 33/III (5) hodi rekuza ratifikasaun ba nomeiasaun ba Deolindo dos Santos ba kargu Prezidente Tribunal Rekursu ne’ebé Parlamentu Nasionál (PN) aprova iha 9 Maiu foin lalais.
Tuir JSMP, nomeiasaun ba Prezidente Tribunal Rekursu ne’e legal tanba validu no la’o tuir Lei númeru 11/2004, artigu 110 alineia 4, kona-ba alternasaun Estatutu Majistradu Judisiariu.
“Nomeiasaun ne’e sei iha ambitu no natureza kompetensia Konstituisional Prezidente Repúblika nian,” deklara Diretór Ezekutivu JSMP, Luis Oliveira Sampaio liu husi komunikadu imprensa ne’ebé jornál INDEPENDENTE asesu, Kinta (11/05).
Diretór ne’e hatutan, nomeiasaun no tomada posse ba Prezidente Tribunál Rekursu foun, nudar resposta ba karta rezignasaun husi Prezidente Tribunál Rekursu sesante, Guilhermino da Silva ne’ebé aprezenta nia pedidu rezignasaun tanba razaun saude ne’ebé la permite nia atu kontinua asume nia kargu.
Luis hatutan, artigu 110 Lei númeru 11/2004 ne’e mós la refere ratifikasaun husi Parlamentu Nasionál.
“Nomeiasaun ne’e mós tuir intensaun Parlamentu Nasionál nian ne’ebé hatudu ho klaru iha rezolusaun Parlamentu Nasionál númeru 5/2003, 22 Jullu 2003 kona-ba Dekretu Prezidente Repúblika númeru 6/2003. Rezolusaun ne’e dehan katak, pozisaun Prezidente Tribunál Rekursu la nesesariamente hetan ratifikasaun husi Parlamentu Nasionál, tanba Tribunál Rekursu hala’a nia knar, Supremu Tribunál Justisa ho karater temporariu ka trazitoriu de’it,” hatete Diretór JSMP ne’e.
Tanba ne’e, tuir nia, PN tenke tuir Lei númeru 11/2004 kona-ba Majistradu Judisiariu ne’ebé PN rasik mak aprova.
“Tuir lei ida ne’e, nomeiasaun ba Dotor Deolindo dos Santos hanesan Prezidente Tribunál Rekursu validu ho legal,” katak nia.
JSMP husu mós ba PN atu tenke konsistente ho rezolusaun ne’ebé PN rasik produs, nune’e bele evita konfunzaun públiku nian kona-ba funsionamentu orgaun no instituisaun politiku demokratika sira estadu nian iha termu foti desizaun. Importante katak dezisaun ne’e tenke iha koridór no norma sira Konstituisaun no Lei.
Aleinde kestaun legalidade, Diretór JSMP ne’e dehan, presiza hanoin mós razaun fundamental balun ne’ebé relevante ho nomeiasaun ne’e. Tanba, nomeiasaun ne’e hanesan solusaun ba situasaun pendente ba lideransa iha Tribunál Rekursu.
“Antes ne’e, PN rasik ezije Prezidente Repúblika atu nomeia PTR foun. Maibé, iha momentu ne’eba Prezidente Repúblika rekuza atu halo nomeiasaun ne’e tanba bele afeita ba situasaun saúde Prezidente Tribunál Rekursu nian ne’ebé iha prosesu rekoperasaun nia laran,” katak Luis.
Nia afirma, nomeiasaun ne’e hanesan respota ba pedidu regzinasaun husi PTR sesante no importante liu atu asegura efetividade no funsionamentu regular Tribunál Rekursu nian ne’ebe iha tempu hanesan asumi mós responabilidade regular nudar Supremu Tribunál Justisa (STJ) no la iha razaun atu halo adiamentu ne’ebé la nesesariu.
Luis hatutan, nomeiasaun ne’e mós ezije atu antisipa disputa reklamasaun elietór ruma ne’ebé akontese durante eleisaun parlamentár no atu asegura katak Tribunál Rekursu kontinua funsiona hodi hatan disputa elietóral ka disputa sira seluk iha ambitu kompetensia Supremu Tribunál Justisa nian, nune’e mós atu fó sai rezultadu eliesaun parlamentu nian.
