Asaun ne’e CAC foti hafoin Kuarta-feira (9/12), Espesialista Anti-Korrupsaun (EAK) sira hala’o hela knar iha terenu hodi monitoriza prosesu fahe aihan Sesta-Basika. Maibe, EAK sira detekta batar fohuk, koto no modo tahan dodok sira ne’ebé atu fahe ba populasaun konsumu.
Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio mak lidera ekipa Espesialista Anti-Korrupsaun (EAK).
Komisaun laos hapara de’it prosesu fahe ai-han bazika obrigatoriamente ba povu iha Suku Comoro, maibé prende mos ai-han sira ne’ebé fohuk ona hanesan batar, koto no modo tahan dodok sira.
Sampaio hateten, EAK no CAC la soi atu kompaña Dili Mart kontinua fahe aihan bazika sira tanba ai-han bazika fohuk sirak ne’e merese atu ba fó han fahi no la’os povu kbit laek sira.
“Ami koalia tiha ona ho manager kompanha atu hapara distribuisaun ai-han bazika hanesan batar fohuk, koto no modo tahan dodok ba populasaun. Ai-han fohuk sira ne’e merese fo han ba animal ou fahi no laos ba ita ninian povu,”dehan Sampaio.
Ekipa EAK mos prende café falun balun tanba la tuir lista gramas no folin ne’ebé Ministeriu Komersiu no Industria (MCI) determina. Maibé, iha terenu kompaña Dili Mart fahe la tuir ninian kilogaramas determinadu.
Tuir Sampaio katak, sei iha konsekuensia seriu ba irregularidade ida ne’e no CAC sei bolu manager kompaña no responsavel programa Sesta Bazika nian iha MCI.
“Batar ne’ebé fohuk ho modo ne’ebé dodo kami (prende) no sei halo prosesu. Depois ami sei notifika Nain ba Loja (Dili Mart) ne’e ho ninian responsavel sira. Autoridade kompetente (iha MCI) ne’ebé mak durante ne’e akompaña. sira ninian responsabilidade atu halo supervizaun. Sira mai e sira haree hela mais husik hela deit. (Pesoal MCI) sira ohin iha ne’e hela mais sira haree deit no la intervein. Sasan sira ne’e la refleta kualidade ne’ebé mak ita nian povu merese hetan no valor ($50) ne’ebé mak iha,”Komisariu Adjunto Luis Sampaio hateten.
Komisariu ne’e mos hatutan, CAC antes ne’e deskobre sirkumstansia hanesan iha fatin seluk’ Hera, Metinaro no Liquica maibé kompaña no autoridade kompetente la hadia.
“Entaun ohin ami halo intervensaun hodi hapara distribuisaun Sesta Bazika ne’e. Ami aviza tiha ona mais sira lakohi hadia. Entaun ami hapara no lori sasan (fohuk ho dodok) sira ne’e ba no halo prosesu investigasaun tuir mai,” Komisariu Adjunto Luis Sampaio afirma. (komunikadu)
