"ADTL nia observasaun Governu sidauk fó atensaun maximu ba Ema ho Defisiénsia, ida ne’e bele nota katak baihira ita lao ba de’it visita Largo, ita sempre hetan Ema ho Defisiénsia toba iha neba maibé Governu no Estadu seidauk tau matan,"dehan Cesario, ohin iha Sentru Convensaun Dili (CCD) ba Online Independente, bainhira komemora loron mundial Ema ho Defisiénsia iha Timor-Leste.
Ho kondisaun ema ho defisiénsia sira, ADTL husu ba entidade hotu-hotu liuliu Governu atu bele tau matan.
ADTL ezijé Governu no entidade kompetente hotu atu ratifika lalais konvesaun direitu Ema ho Defisiensia iha Timor-Leste.
"ADTL dezafia ba Estadu no Governu atu ratifika lalais konvensaun direitus ba ema ho defisiénsia iha Timor-Leste atu ADTL bele dezempeña no mellora tan servisu iha futuru. ADTL preukupa tanba sa mak nasaun hotu-hotu iha mundu ratifika ona maibé Timor-Leste seidauk," dehan nia.
Tuir Cesario katak, Timor-Leste laiha rajaun atu adia ratifikasaun konvensaun direitu ema ho defisiénsia. Tanba Ema ho Defisiénsia iha ona abilidade naton hodi sustante sira nia moris no bele hola parte iha dezenvolvimento nasionál.
Ezemplu, ho provas katak ema ho defisiénsia na’in lima de’it bele utiliza hand traktor hodi halo natar iha Vikeke Watulari no oras ne’e dadaun nia rezultadu fa’an ona iha merkadoria.
ADTL sujere Governu tenke implementa politika ho slogan, labele husik ema ida iha kotuk maibé tenke trata ema hot-hotu ho dignu no hanesan hodi kontribui ba dezenvolvimento nasionál iha Timor-Leste bazea ba slogan ADTL katak "Timor-Leste Mak Ita,Sura Mós Ema ho Defisiensia".
Tuir dadus ADTL hatudu ema ho defisiénsia rihun 38,118 iha teritorio laran tomak husi total populasaun Timor-Leste tokon 1.2.
Entretantu Vise Ministru Edukasaun Desporto no Kultura, Antonio Guterres iha nia intervensaun hateten simu ona dadus husi ADTL katak ema ho defisiénsia iha Timor-Leste hamutuk rihun 38,118 ne’e maioria abandona eskola.
Tanba ne’e, Ministeriu Edukasaun kontinua esforsu no servisu hamutuk ho ADTL hodi haruka ema ho defisiénsia atu bele konkore iha eskola esklusivu konkorente nian hodi bele hetan sertifikadu hodi nune bele ba kontinua eskola iha nivel ensino superior.
