Komandante Polisia Militár, Majór Abel da Costa Xavier ‘Niki’ hateten, forsa PM sira sei fó apoiu totál ba hodi haforsa seguransa inkordenda iha prosesu kampaña eleitorál to’o formasaun governu foun.

Nia dehan, patrullametu ne’ebé komandante hatún ba membru sira fahe ba tempu kalan no loron hodi halo seguransa iha prosesu kampaña.

“Ami sempre halo komunikasaun no ligasaun ho ita nia maluk PNTL hodi haforsa seguransa”, dehan Majór Niki, iha kampaun Polisia Militár, Kintál Boot-Dili, horisehik.

Nia hatutan, prezensa Polisia Militár nian iha kualkér oras. Patrullamento ne’e rasik hahú iha Dili to’o munisípiu tomak. Tanba ne’e, orden parserial rasik husi komandante instituisaun PNTL ho F-FDTL hatún ona.

Majór Niki dehan, bainhira konfrontasaun akontese Polisia Militár prontu apoiu PNTL hodi haforsa seguransa iha prosesu ne’e rasik.

Tuir nia, durante ne’e, iha operasaun seidauk identifika área sira ne’ebé hamosu konflitu. Maibé kontinua halo operasaun husi munisípiu to’o Dili.

Nia hateten, bainhira konflitu ruma akontese Polisia M sei atua situasaun ho rigorozu.

Antes ne’e, Xefe Estadu Maiór, Majór Jenerál Lere Anan Timur garantia katak, eleisaun lejizlativu iha tinan ne’e sei la’o hakmatek to’o formasaun governu foun.

Nia dehan, Komandante F-FDTL orienta ona membru sira hodi koopera ho PNTL atu kontinua garante nafatin pás no estabilidade.