Maski kompañia Talk Fusion sei ilegál hela, maibé atividade ne’e kontinua la’o namanas iha povu Timor nia leet ho maneira ida povu halo investimentu ba kompañia Talk Fusion.
Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches hateten, laiha entidade ida iha territóriu TL mak halo ninia negósiu sein dokumentu.
“Ami halo koordenasaun liu husi soru-mutu ho reprezentante Talk Fusion para obriga sira atu hatama dokumentu hodi hetan legalidade, maibé sira dehan ne’e kompañia internasionál la presiza hatama dokumentu”, tenik nia, iha edifísiu SERVE Matadouru-Dili, Kinta (22/06).
Tanba ne’e, husu ba públiku atu labele tuir lai negósiu ne’e, tanba negósiu ne’e halibur osan.
SERVE ho BCTL tenta hapara atividade ne’e tanba iha artigu 5 no artigu 31 lei numera 5/2011 iha 15 de Junho ne’ebé hatuur iha lei orgániku BCTL nian ne'ebé fó responsavel eskluzivu ba BCTL atu regula, lisensa, rejistu no supervizaun ba atividade finanseiru hotu iha TL.
Ne'e duni SERVE no BCTL hasai ona notifikasaun ba individu sira ne'ebé organiza hela atividade eskema finanseiru Talk Fusion iha TL atu hapara sira nia atividade to’o tempu bainhira hetan ona lisensa no autorizasaun husi autoridade relevante iha TL.
Sanches hateten, iha artigu 26 no 27 husi dekretu lei 35/2009 hateten, dokumentu ne'ebé nesesáriu atu kompañia internasionál ida mai hala’o sira nia negósiu ekonomia iha TL. Tenke lori sira nia dokumentu ba notariadu públiku iha país orijen para bele sertifika no verifika dala ida. Husi ida ne’e mak foin lori ba iha embaixada TL iha nasaun ne’e para bele sertifika tan dala ida hafoin mak lori mai TL, maibé kompañia ne’e la halo tuir.
Nia mós esplika, iha artigu 27 dehan kuandu kompañia internasionál ida mak tama ona iha TL tenke haree uluk dokumentu ne’e hakerek ho língua saida, kuandu dokumentu ne’e mak la hakerek ho língua Tetun no Portugés, entaun na'in ba kompañia ne’e tenke buka tradusaun ba língua rua ne’e.
Portantu lei fó dalan katak instituisaun INL mak iha podér atu halo tradusaun ba dokumentu internasionál ne'ebé tama mai TL.
Agora, buat hotu sira seidauk halo, maibé atividade la'o tiha ona tinan rua iha TL. Tanba ne’e, BCTL kondena katak ne’e viola lei makaas. Nune’e, atividade Talk Fusion tinan rua ne’e nunka selu taxa ida ba Estadu, ne’e kontra liután lei tributária númeru 8 /2008.
Kompañia ne’e mós viola tan kona-ba kódigu rejista ninian. Husi atividade sira ne’e kuaze ema rihun tolu envolve ona. Problema boot ba Estadu TL kuandu akontese buat ruma iha nasaun ne’e sé atu responsabiliza. Ne'e duni, Estadu iha obrigasaun intervein atividade hodi hapara totalmente.
“SERVE rasik to’o oras ne’e la hatene sira nia fatin iha ne'ebé, maibé intelijen BCTL nian hetan ona sira nia fatin, inklui hasai fotografia no tempu badak ekipa SERVE no BCTL sei tun direita hodi hapara sira nia atividade ne’e”, dehan Florêncio.
Ho nune’e SERVE prontu foti medida ba kompañia ne’e kuandu kontinua ulun toos nafatin ho ninia atividade ilegál ne’e. Tanba, iha ona membru balun hato’o keixa kona-ba kauza ne’e.
