Diretór Jerál STAE, Acilino Manuel Branco hatete, antes ne’e fó sai katak 10 Juñu remata ona resenseamentu eleitorál no atualizasaun baze dadus, maibé xefe governu fó sai ona despaxu atu estende kona-ba atualizasaun baze dadus.

Atu halo prolongamentu ba atualizasaun baze dadus ne’e la’o iha rai laran no estranjeiru.

Tanba, momentu ne'ebá kuandu aprova kalendáriu liu husi konsellu ministru liu husi rezolusaun momentu ne’e aprova, Presidente Repúblika promulga tanba hanoin katak eleisaun ne’e monu iha inisiu Jullu, entaun resenseamentu ne’e to’o de'it Maiu, maibé aprova tiha kalendáriu Prezidente Repúblika marka fali data eleisaun iha dia 22.

Tanba ne’e, aktu eleitorál tenke akontese iha loron 80 nia laran ho razaun ne’e mak Xefe Governu halo despaxu hodi akontese prolongamentu ba data resenseamentu to’o fali iha loron 10 Jullu antes tama ba eleisaun.

Prosesu sira ne’e remata ona, maibé agora daudaun ne’e STAE sei halo hela imprime ba naran sira ba iha suku, atu komunidade sira bele haree kuandu sala ruma iha sira halo reklamasaun atu STAE bele hadi'a.

Tuir nia, agora daudaun ne’e númeru eleitór sira ne'ebé rejistu hela ne’e sei provizóriu, maibé iha loron 22 mai bele ona atu publika sai rezultadu ne'ebé ho númeru serteza atu povu no partidu polítiku sira bele asesu ona.

Nia hatutan, kuandu fó sai ona rezultadu ba totál eleitór ne'ebé rejistu ona ne’e sei labele simu ona rejistu foun, maibé sei kontinua ba ema sira ne'ebé nia kartaun lakon ka tohar ne’e bele halo atulizasaun tanba la fó impaktu ba mudansa númeru eleitór ne'ebé rejistu ona ne’e.