Lideransa na’in rua ne’e hakarak haree partidu polítiku sira hodi kria nafatin situasaun pás no estabilidade durante tempu kampaña nian, hodi hato’o programa polítika partidu nian ba militante no simpatizante.

“Ita boot sira tun ba para hato’o ita boot sira nia programa”, dehan PR Francisco Guterres ‘Lú-Olo’, liu husi diskursu enkontru ho lider partidu polítiku iha, iha Palasiu Prezidénsia Nicolau Lobato, Ai-Tarak Laran, Sesta (16/6).

Bainhira hato’o de'it programa naturalmente tenke uza linguajen ne'ebé fasil atu povu no militante no simpatizante partidu polítiku ida-idak bele kumpre liután saida mak sira hato’o.

“Se ita boot sira tun ba maka hodi hateten fali (ema ne’e) nia oin ne’e oinsá? Se hato’o ida ne’e ba povu sente ladún di'ak ida”, tenik nia.

Ba lider partidu polítiku sira hotu tenke lori programa mak sai boot atu povu sira bele garantia programa ne'ebé partidu ida ne’e hato’o, la'ós lori liafuan insulta malu dehan ida ne’e aat no ida seluk di’ak. Importante mak programa ida ne'ebé sai alternativu.

Povu ida ne'ebé matenek hakarak atu hatene saida mak lider polítiku sira hato’o ba sira. Ne’e duni, bainhira hato’o liafuan atu boot ka ki'ik povu sura hatene, maibé sira rai hela sira nia mala okos.

“Ita boot sira nia kompromisu ida to’o bainhira ita boot sira kaer ukun karik tenke realiza duni saida mak ita boot sira hatete ba, para nune’e sira bele hatene dehan katak realemente partidu ida ne’e serve duni”, dehan Lú-Olo.

Kuandu dehan katak iha vontade sai alternativa ba iha governasaun país, signifika lider polítiku sira iha vontade atu bele mós garantia pás no estabilidade hanesan presupostu ida importante tebes bele halo dezenvolvimentu ne'ebé lori iha liman liu husi programa polítika.

Lider sira Evita Linguajen Inflamatória

Kampaña eleisaun lejizlativa lider partidu polítiku sira sei hato’o programa liu husi linguajen no métodu oioin. Tanba ne’e, tenke evita linguajen inflamatória no ofende malu atu labele fó todan ba povu ki’ik.

“Ha’u apela ba lider partidu polítiku sira atu evita linguajen inflamatória hodi ofende malu. Atu nune’e iha kampaña polítiku ne’e la'o bele iha maturidade polítika ida di'ak”, dehan Primeiru Ministru, Rui Maria de Araújo.

Nia hatutan, Timor-Leste tenke hatudu ba mundu katak timoroan sira tasak ona iha polítika no komprende ona demokrasia.

Partidu ida-idak sei hato’o sira nia programa liu husi linguajen no métodu oioin. No povu mak sei deside atu fó votu ba se.

“Ha’u apela ba populasaun tomak atu rona didi'ak programa sira ne'ebé partidu polítika sira sei fó”, nia apela.

Povu tomak tenke matenek atu fó votu tuir konxiénsia ida-idak. Lider sira tenke fo konfiansa di'ak liu tan husi militante no simpatizante sira para bele hetan votu iha eleisaun parlamentár

Partidu Sanulu Promete Hakribi Violénsia

Entretantu, husi totál partidu polítiku 21 ne’ebé atu partisipa iha eleisaun lejizlativa, hamutuk partidu 10 kompromete ba povu, igreja, militante no simpatizante iha Timor laran tomak katak, sei laiha violénsia iha tempu kampaña.

Partidu sanulu ne’ebé partisipa iha deklarasaun hakribi violénsia, ne’ebé hala'o iha Jardín Bidau-Lesidere, Sábadu (17/6) mak hanesan CNRT, FRETILIN, PD, FM, PLP, UDT, KHUNTO, PUDD, CASDT no BUP.

Komisáriu Jurídiku CNRT, Arao Noe de Jesus hateten, CNRT hakribi violénsia signifika hakarak pás no hakmatek. Ne'e duni, CNRT promete kampaña sei la'o hakmatek.

Tanba ne’e, husu ba apoiante no simpatizante CNRT nian atu kumpre desizaun ne'ebé hatuur ona katak tenke respeita partidu seluk nia atividade tanba mesak timoroan de’it.

Partidu CNRT prontu simu rezultadu saida de’it mak sei mosu iha eleisaun. Lakon ka manan CNRT prontu nafatin kontribui ba dezenvolvimentu nasaun ne’e nian.

Arcangelo Leite husi Partidu Demokrátiku (PD) hateten, partidu ne'ebé atu kaer ukun povu mak sei deside. PD sei respeita nafatin kualkér desizaun ne'ebé povu deside iha 22 Jullu. Karik rezultadu oin mai mak hatudu PD seidauk hetan konfiansa husi povu atu kaer ukun, sei hakru'uk nafatin ba desizaun ne’e.

Manan ka lakon povu mak sei deside. Se PD mak la simu rezultadu ne'ebé povu deside, entaun PD la serve harii partidu demokrátiku iha nasaun ne’e”, tenik nia.

Francisco Miranda Branco, Vise-Prezidente Partidu FRETILIN hateten, kompremetidu hodi uluk kedas hakribi violénsia, hakarak de’it mak pás no estabilidade iha territóriu tomak. Tanba husi pás no estabilidade mak labarik sira bele eskola ho hakmatek, ferik no katuas sira laran la taridu, to’os no natar na'in sira sei servisu hodi produs ai-han ba territóriu laran tomak.

Mensajen FRETILIN nian, husu ba povu tomak iha rai doben ida ne’e atu halo festa demokrasia sai festa povu Timor nian. Rezultadu saida de’it mak sei mosu iha eleisaun ne’e hotu-hotu tenke hakru'uk hodi simu.

José Luis Guterres, Presidente Partidu Frente Mudansa (FM) dehan, pás no estabilidade mai husi sidadaun timoroan hotu. Festa demokrasia ne’e la'o ho susesu povu timoroan hotu tenke kaer liman hamutuk hodi hakat ba prosperidade ida ne'ebé di'ak liu.

Abel Pires da Silva, Vise-Prezidente PLP, kompromete katak, rezultadu saida de’it mak sei mosu mai iha eleisaun PLP hakru'uk no onra. Tanba, desizaun ne’e mai husi povu.

“Ha’u husu ba ita hotu atu respeita desizaun ne'ebé sei mosu iha eleisaun nia laran, tanba povu mak sei determina partidu ne'ebé sei kontinua kaer ukun iha 2017-2022”, tenik nia.

Nune’e, Ângela Freitas, husi Bloku Unidade Populár (BUP) dehan, ko'alia pás sentidu katak laiha funu no konflitu. Importante liu mak hadomi no respeita malu.

BUP adopta prinsípiu unidade nasionál no estabilidade. Tanba ne’e, husu ba lider parpol sira atu iha festa demokrasia ne’e tenke hatudu maturidade polítiku, liu husi programa partidu nian ne'ebé trasa ona. La'ós atu insulta malu. Povu tenke matan mós atu hili partidu ne'ebé bele lori povu ba moris di'ak.

Asina Pakta Unidade Nasionál

Tama ba kampaña eleisaun lejizlatura períodu 2017-2022, Xefe Estadu Timor Leste, Francisco Guterres ‘Lú-Olo’ halibur lider partidu polítiku sira hodi halo pakta unidade nasionál nune’e hodi hametin nafatin pás no estabilidade iha nasaun.

Diskusaun ne’e, ho tema, “Hametin Papél Partidu Polítiku hodi Garantia Pás no Estabilidade iha eleisaun lejizlatura” ne’e hetan partisipasaun husi partidu 20, úniku partidu Frente Mudansa mak la hola parte.

Prezidente Repúblika dehan, tuir kompromisu eleitorál katak Prezidente Repúblika atu garantia pás no estabilidade no iha trankuilu nia laran. Ne’e duni, liu husi hanoin no hahalok hakarak atu bele hametin liután rain ne’e iha pás no hakmatek.

“Prezidente Repúblika hakarak kaer nafatin unidade nasionál, unidade ida ne'ebé atu halo sai timoroan loloos”, tenik Xefe Estadu.

Hotu-hotu hatene asiste sai mós testemuña no autór prinsipál importante ne’e ba demokrasia iha rai doben ida ne’e katak partidu polítiku sira mak sai hanesan reprezenta povu ninian sai mós hanesan organizasaun ida ne'ebé halibur vontade polítiku povu nian.

Agora daudauk partidu polítiku sira prepara atu tun ona Lú-Olo husu ba lider polítiku sira tenke sei sai alternativa ba governasaun ida ne’e.

Nia husu lider sira atu aprezenta ida-idak ninian programa, labele hamosu ho liafuan ne'ebé la merese atu hato’o ba povu sira.

Iha soru-mutu ne’e, partidu polítiku sira hotu-hotu atu pakta unidade nasionál no kuda mós ai ba dame nian.