Diretór Nasionál Asistensia Sosial-Ministériu Solidariedade Sosial (MSS), Mateus da Silva hatete, HIV/SIDA sai hanesan asuntu sensitivu ida, tan ne’e defisil tebes atu identifika.
Nia dehan, ema ne’ebé pozitivu HIV/SIDA dala-barak taka an nune’e difikulta autoridade sira atu bele fó apoiu ba tratamentu saúde.
“(Defisiente) sira ne’ebé hetan HIV/SIDA la barak, tanba ida ne’e issu ida ne’ebé sesitivu, tanba ema ida kuandu afeita ba moras ida ne’e nia la brani atu hatete nia an ba ema. Sira hetan ne’e iha na’in tolu ka haat hanesan ne’e,” dehan Mateus ba jornalista sira hafoin enkontru ho defisiente sira iha sede Asosiasaun Defisiente Timor-Leste (ADTL), Maskariñas, horisehik.
Ho kondisaun ida ne’e, nia dehan, dala-balun difikulta defisiente sira atu trata sira-nia dokumentu hodi hetan asistensia husi MSS.
“Dala-ruma maluk sira ne’ebé hetan HIV/SIDA sira atu ba trata dokumentu ruma iha Xefe Suku no sira atu hatete moras ne’e maibé Xefe Suku ladun komprende, husu nafatin, entaun sira labele atu trata tan dokumentus,” katak nia.
