Komandante Jeral PNTL, Komisariu Julio da Costa Hornay informa katak, bazeia ba rezultadu autopsia ne’ebé mediku Hospital Nasionál Guido Valadares (HNGV) halo hatudu katak matebian mate tanba hetan tiru.

“Liu husi autopsia rezultadu fó sai katak kilat musan iha mateisin, tanba ne’e Komandu loke prosesu,” deklara Komisariu Julio liu husi konferensia imprensa iha Kuartel Jeral PNTL Kaikoli-Dili, Seguda (8/5).

Nia dehan, Komando PNTL sei halo ezame balistiku hodi bele hatene loloos see mak tiru matebian.

Ba ezame balistiku, nia hatutan, tanba enfrenta problema fasilidade, Komando PNTL propoin atu halo ezame ne’e iha Australia no Indonezia.

“Prosesu investigasaun mak identifika katak see loos mak tiru mate vitima,” deklara Komisariu Julio.

Komandante ne’e dehan, kazu konfrontu ne’e mosu entre grupu artemarsial iha area Bebonuk.

Iha Parlamentu Nasionál Prezidente Komisaun B ne’ebé trata asuntu Defeza no Seguransa, David Diaz Ximenes ‘Mandati’ husu ba governu atu tenke foti desizaun rigorozu ba membru PNTL ne’ebé envolve aktu ne’e.

Tuir Mandati, bainhira membru seguransa mak foti asaun rigorozu hasoru komunidade sira bele implika situasaun manas iha rai laran.

Nia dehan, bainhira mosu konfrontasaun, membru PNTL sira ne’ebé halo atuasaun presiza analiza situasaun molok foti desizaun ruma.

Atu halo kapturasaun suspeitu ruma, nia dehan, polisia tenke aleza suspeitu ne’e iha parte ain la’os tiru mate.

Entretantu, molok ne’e tuir informasaun husi familia vitima katak, Tiago mate tanba deskonfia hetan tiru husi pesoal polisia bainhira halo atuasaun ba konfrontu iha área Bebonuk Sabadu (06/05).

Konfrontasaun ne’ebé akontese iha Bebonuk (SD Tingkat) entre joven akontese maizumenus iha tuku 17:00 loraik, hafoin situasaun normal fila-fali maibé liu oras ida resin komesa bo’ok-malu fali no polisia hahú halo intervensaun.

“Bainhira polisia komesa tama hodi halo atuasaun ba problema ne’e (polisia) sira tiru razada de’it, maizumenus sira tiru dala neen hanesan mak rezulta alin ne’e mate fatin,” informa familia matebian, Sandra Alves Coelho iha mortuariu HNGV, Sabadu kalan.

Tuir nia, matebian ne’e la envolve iha konfrontasaun ne’e maibé nia foin fila husi serbisu-fatin atu ba uma.

“Derepente polisia tiru kona alin-nia fuan, nia mate iha ami-nia uma oin,” dehan nia ho triste. 

Bainhira haree Tiago monu, Sandra dehan, sira sai mai hodi hakilar ba polisia maibé polisia sira dehan katak ema mak sona la’os sira mak tiru.