Tuir planu, Domingu (26/3), CNE relata rezultadu apuramentu nasionál ba tribunál rekursu hodi halo anúnsiu públiku.

“Iha 72 horas ami tenke lori ona ba tribunál rekursu”, dehan nia, iha edifísiu CNE-Kolmera, Sábadu (25/3).

Nune’e, tribunál rekursu iha tempu oras 48 nia laran halo anunsia públiku no iha tempu oras 24 nia-laran, fiskais husi kandidatu na’in ualu bele reklama rezultadu ne'ebé iha.

Komisáriu Alcino esplika, CNE halo verifikasaun ba materiál ho dokumentu sira hanesan kaixa urna, akta imprimisaun rezultadu eletróniku husi apuramentu munisipál, rejionál no estranjeiru, akta orijinál rezultadu operasaun sentru votasaun ho estasaun votu sira, envelope buletin votu nulu no reklamasaun sira.

Totál akta apuradu hamutuk 696 (100%), totál eleitór rejistadu 743.150, eleitór partisipante 528.813 ho taxa partisipasaun 71,16%, totál votu válidu 516.881 (97.74%), votu nulu 8.989 (1,70%), votu branku 2.911 (0,55%), votu reklamasaun 0 (0,00%), votu rejeitadu 32 (0,01%).

Totál votu ne'ebé kada kandidatura ba presidente repúblika sira hetan mak Francisco Guterres ‘Lu-Olo’ 295.048 (57,1%), António da Conceição 167.794 (32,5%), José Luis Guterres 13.513 (2,6%), José António de Jesus das Neves 11.663 (2,3%), Luis Alves Tilman 11.125 (2,2%), António Maher Lopes 9.102 (1.8%), Maria Ângela Freitas da Silva 4.353 (0,8%), Amorin Vieira 4.283 (0,8%).