Foin-sa’e ne’ebé moris iha Otcho-Tchau, Suku Lore I, iha 16 Abril 1993 ne’e hatete, nia razaun hakarak kandidata aan tanba hakarak promove no hasa'e produsaun suku laran, nune'e komunidade sira bele hadi'a sira-nia ekonomia.

"Kria kooperativa, tanba programa ida ne'e atu haforsa inisiativa komunidade sira nian ne'ebé ejiste ona. Programa refere sei ho forma oioin hanesan hasa'e produsaun ai han, rai osan no fo kreditu," dehan oan-mane husi Dimantino Marvao ho Valentina de Jesus ne’e.

Lisensiatura iha area edukasaun husi Universidade Oriental Timor Lorosa’e (UNITAL) ne’e hatutan, programa refere ho objetivu atu hakbi'it ekonomia familia hodi hamoris hikas tradisaun servisu hamutuk ba hadi'a moris ne’ebé ne’ebé sai nu’udar kultura loloos povu nian.

Alende ne'e mos, sei harii edukasaun popular ho prioridade ba maluk sira ne'ebé la asesu no para eskola sedu tanba kestaun ekonomia familia.

"Atividade hirak husi programa ne'e mak sei loke formasaun lingua, media, formasaun sidadania ba arte marsial no ritual sira, nune'e mós sensibiliza informasaun ba asuntu feto inklui ba ema ho defisiensia."

Nu’udar Xefe Suku, nia dehan, sei kria mós parseria permanente suku ho objetivu atu kria relasaun parseria permanente suku vizinu, movimentu sosial, NGO, universidade, media, relijiozu no entidade seluk ne'ebé iha vizaun hanesan ba dezenvolvimentu suku.

Aleinde ne’e, Bernardino dehan, nia sei loke mós festival agro ekolojia ne’ebé atu promove no hamoris hikas tradisaun komunidade nian ba Sau Batar, halo lisan no seluk tan.

"Festival ne’e ho objetivu hodi promove tradisaun komunidade suku Lore nian ba komunidade fatin seluk, ne’e mós hanesan estratejia hodi komunidade lokal sira bele fa’an sira-nia produtu no konta sira-nia istoria," dehan nia.