Francisca moris iha Dili iha 10 Dezembru 1983, nu'udar oan dahuluk husi bin-alin na'in neen (6), oan husi Julião Barreto ho Martha Maromon Barreto.

Francisca hahu estudu iha eskola primaria Bidau Akadiruhun iha tempu okupasaun Indonezia husi tinan 1990 to’o 1996, kontinua fali ba nivel pre-sekundariu iha eskola SMP 5 Bekora iha tinan 1997 to’o 1999 no kontinua hikas fali ba SMA 3 Balide—agora sai eskola Sekundaria 4 Setembru—husi tinan 2000 to’o 2002.

Francisca hakarak kandidata hodi kompete iha eleisaun suku tanba hakarak iha mudansa, liu-liu dezenvolvimentu iha suku Metiaut.

"Atu dezenvolve suku Metiaut no komunidade ba dezenvolvimentu sustentavel," dehan nia ba Jornalista Jornal INDEPENDENTE.

Dezenvolvimentu sustentavel, tuir nia, mak atu hadi'a kondisaun balun ne'ebé seida'uk iha nune'e bele iha, hanesan promove no defende direitu feto no mós luta ba nesesidade baziku, liu-liu hanesan bee-moos tanba tinan barak ona komunidade iha suku refere susar ba asesu bee-moos.

"Promove no dezenvolve joven sira iha area edukasaun hanesan loke fatin formasaun hodi fó treinamentu ba sira atu nune'e bele aumenta abilidade joven sira nian hodi hado'ok sira husi konflitu."

Aleinde ne’e, nia dehan, sei hadi'a no hamoos fatin turistiku tanba suku Metiatu koñesidu ho area turizmu ne'ebé furak.

“Sei organiza joven sira hodi hadomi ambiente hodi labele so'e fo'er arbiru no hamoos area tasi hodi bele moos atu nune'e bele atrai turista tantu nasional no internasional."

Nia hatutan, sei promove no dezenvolve joven, inklui inan-aman sira liu husi ko'alia ho parte kompetente hodi fó treinamentu no apoiu hodi harii kooperativa, nune’e liu husi dalan refere bele ajuda hadi'a ekonomia familia nian.

"Promove no fasilita ha'u-nia feto maluk ba atividade komunitariu, suporta sira ninia partisipasaun masimu ba dezenvolvimentu suku. Enkoraza feto maluk sira ba partisipasaun iha edukasaun atu nune'e sira brani hamari'ik iha oin ba dezenvolvimentu suku," katak nia.