Ministru Negósiu Estranjeiru no Kooperasaun (MNEK), Bendito Freitas informa, Prezidente Repúblika, José Ramos Horta, ezerse funsaun konstituisionál hodi nomeia Embaixadór dejinadus na'in rua.

"Marciano Octavio Garcia da Silva, nu'udar Embaixadór Repúblika Demokrátika Timor Leste (RDTL) ba Repúblika Filipina, no nomeiasaun ba Embaixadór Maubere Lorosa'e da Silva Horta nu'udar Embaixadór Extraordináriu Plenipotensiáriu RDTL ba Repúblika Populár Xina. Tuir regras sira sei kumpri sira nia mandatu ba tinan tolu," informa MNEK Bendito ba jornalista sira hafoin posse ba embaixadór rua ne’e iha palásiu Prezidensiál, Tersa (24/10).

Ba nasaun rua ne’e, nia hatutan, presiza duni diplomata ne'ebé iha kualifikasaun no iha esperénsia atu bele reprezenta estadu Timor-Leste ho dignidade iha nivél ne'ebé as, no atu bele halo diálogu ho parseiru sira no diplomata sira iha nivél ne'ebé respeitadu iha nasaun sira ne'ebé sira ba reprezenta.

“Ita-bo'ot sira haree Embaixadór na'in rua ne'e nu'udar kuadru Timorense ne'ebé kualifikadu, sira na'in rua ne'e antes ne'e hanesan ona Embaixadór no agora re-tomada ba misaun diplomátika, ida sei ba Repúblika Populár Xina, no ida ba Repúblika Filipina,” dehan nia.

Molok ne’e, Marciano Octavio Garcia da Silva nu'udar Embaixadór Timor-Leste ba Zenebra, no Maubere Lorosa'e da Silva Horta nu'udar Embaixadór Timor-Leste ba Kuba.

Dada Investor Xina

Maubere Lorosa'e da Silva Horta ne’ebé hetan fiar hodi sai Embaixadór Extraordináriu Plenipotensiáriu RDTL ba Repúblika Populár Xina konsidera Timor-Leste iha problema barak ho dezempregu tanba ne'e prióridade dahuluk mak sei dada investedór husi Xina mai investe iha Timor-Leste.

"Timor-Leste iha problema barak ho dezempregu tanba ne'e ha'u-nia prióridade númeru dahuluk mak atrai investedór husi Xina mai investe iha Timor Leste, tanba Xina hanesan país boot no segunda maiór ekonómia iha mundu no iha poténsia boot atu bele mai investe iha Timor Leste.”

“Tanba ha'u-nia relasaun ho Xina iha tempu kleur iha área akadémika, 2005 ha'u halo Estudu akadémiku iha universidade defeza nasionál iha Xina, 2014 to'o 2017 servisu iha Embaixada Xina hanesan konsilleru," dehan Loro Horta hafoin simu posse husi PR Horta.

Iha fatin hanesan, Marciano Octavio Garcia da Silva, nu'udar Embaixadór Timor-Leste ba Repúblika Filipina agradese ba estadu no ba governu ne'ebé fó konfiansa ba nia.

Konfiansa ida ne'e, nia dehan, mai ho responsablidade no mai mós ho obrigasaun atu servisu ba povu no ba nasaun ida ne'e.

"Prióridade dahuluk mak atu hametin no habelar Timor-Leste nia relasaun ho povu Filipina tanba Timor-oan barak mak eskola (iha Filipina). Tanba ne'e hanesan diplomata no reprezentate Estadu Timor-Leste iha Filipina sei servisu atu proteze no tulun sidadaun Timor-oan sira ne'ebé hela iha rai Filipina," katak nia.

Aleinde ne’e, nia hatutan, sei tulun explora oportunidade sira ne'ebé Filipina iha hodi lori mai Timor-Leste liu husi kooperasaun atu bele tulun dezenvolvimentu nasionál liu husi investimentu ruma iha Timor-Leste.