Diretór Klinika Hospital Nasionál Guido Valadares, Marcelino Correia informa, daudauk ne’e iha ona pasiente na’in 50 mak hetan ona pasaporte.

“Ita-nia pasiente 140 ne'ebé mak durante ne'e pendente hela atu ba halo tratamentu iha rai li'ur tanba kaderneta passaporte laiha. Agora daudaun ita-nia pasiente hamutuk 50 mak iha ona passaporte atu ba halo tratamentu saúde iha rai li’ur," dehan Marcelino iha HNGV, Tersa (24/10).

Ba pasiente na’in 90 seluk ne’ebé seidauk hetan pasaporte, nia dehan, HNGV nafatin asegura sira liu husi tratamentu to’o sira hetan pasaporte hodi bele ba rai li’ur.

“Ba pasiente sira ne'ebé mak seidauk iha passaporte, HNGV nafatin asegura sira hodi fó nafatin tratamentu ba sira atu nune'e hein bainhira kaderneta passaporte iha bele halo transferensia ba halo tratamentu iha rai li'ur,” nia dehan.

Molok ne’e, Prezidente Junta Mediku Nasionál (JMN), Hospital Nasionál Guido Valadares (HNGV), Ana Magno informa, daudauk pasiente na’in 189 sei pendente ba pasaporte, tanba sira-nia dokumentus seidauk kompletu.

"Daudaun ne'e pasiente hamutuk 214 no na'in 25 hetan ona pasaporte, maibé 189 seidauk hetan pasaporte hodi ba halo tratamentu iha rai li’ur, tanba balun dokumentus laiha hanesan Sertidaun Batizmu no Sertidaun RDTL," dehan nia.

Nia esplika, dezde Janeiru to'o Outubru 2023, Junta mediku rejistu kazu hamutuk 500, husi ne'e 214 mak pendente ka dokumentu seidauk kompletu.

"Fim de Agostu ne'e rejistu kazu foun 74, semana kotuk iha ona pasaporte entaun junta mediku aprova pasiente 25 hetan ona pasaporte no pendente 189," nia dehan.

Nia afirma, husi kazu 25 ne'e na'in 7 mak hetan pasaporte diplomata tanba pasiente urijente, no pasaporte komum na’in 18.

“Kazu urijente hanesan moras fuan no kazu fratura ne'e sira presiza intervensaun lalais atu bele prevene husi moras refere.”