Antes ne’e, Alkatiri deklara katak, lideransa balun uza osan Estadu nian hodi tama sai suku harii partidu.
“Halo kampaña uza osan estadu nian, uza osan povu nian para atu halibur ema para harii partidu foun,” tenik Alkatiri.
Relasiona ho ida ne’e, deputadu bankada FRETILIN no CNRT husu ministériu públiku atu loke investigasaun ba lideransa ne'ebé deskonfia uza osan Estadu harii partidu foun.
Deputadu CNRT, Natalino dos Santos hateten, kuandu deskonfia lider balun uza sala osan Estadu hodi harii fali partidu, ne’e krime korrupsaun. Tanba ne’e, presiza halo investigasaun kle'an ba prosesu ne’e.
Tuir nia, deklarasaun Alkatiri nian dala ruma iha evidénsia forte, tanba ne’e bele fó sai iha kampaña.
Maski nune’e, fila-fali ba kompeténsia ministériu públiku nian hodi halo investigasaun.
“Ha'u fiar katak maun Mari ko'alia ne’e iha evidénsia ne'ebé forte”, dehan Natalino, iha Uma Fukun PN, horisehik.
Iha fatin hanesan, Deputadu Bankada FRETILIN Paulo Monís Maia reforsa, sé mak harii partidu tenke iha rasik fundu hodi atende ba atividade partidu nian, la'ós uza fali osan povu nian hodi harii partidu.
“Karik lideransa partidu ka lider sira balun mak uza fali osan Estadu ba interese privadu ka interese grupu, ne’e ha'u la konkorda”, dehan Paulo.
Sosiedade Sivíl Husu Evidénsia
Entretantu, sosiedade sivíl Luta Hamutuk husu ba Sekjer FRETILIN atu hatudu evidénsia ne'ebé atu bele julga lider ne’e uza osan Estadu ba interese privadu.
Diretór Ezekutivu Luta Hamutuk, Mericio Akara hateten, ne’e hanesan deklarasaun polítika ida. Tanba ne’e, husu sé mak deklara tenke buka evidénsia.
Tuir nia, kuandu lideransa sira akuza malu beibeik hanesan ne’e, ki’ik sira la aprende buat ida.
Ne’e duni, nia sujere atu investiga hodi lider sira ne’ebé akuza malu atu bele deklara no hatudu evidénsia loloos.
Nune’e, Akara mós husu ba lider sira atu halo kampaña tenke ko’alia loloos ninia vizaun no misaun.
“Sukat nia liafuan tanba sira ko'alia ne’e, ema barak nonton. Povu baibain nonton sira insulta hanesan hatudu edukasaun la di'ak”, dehan nia.
Nia akresenta, kuandu liafuan sira ne'ebé lideransa sira ko'alia beibeik hanesan ne’e konserteza jerasaun sira tuir mai ne’e la fó ezemplu ne'ebé di'ak. Tan ne’e, sira tenke banati tuir liafuan insulta malu ne'ebé lider sira ko'alia iha públiku.
