Alkatiri rekoñese Taur Matan Ruak hamutuk ho FRETILIN hodi luta duni durante tinan 24 to’o hetan independénsia, maibé nia-abut la'ós FRETILIN.
“Nia mak Taur Matan Ruak, ita nia Prezidente Repúblika atuál. Nia kandidatu Prezidente Repúblika independente, maibé nia abut la'ós FRETILIN, maibé nia luta ba FRETILIN”, dehan nia, iha kampaña prezidensiál kandidatu Francisco Guterres ‘Lu-Olo’, iha Manufahi, Kuarta (10/3).
Alkatiri hateten, Primeiru Prezidente Timor-Leste nian hafoin restaura independénsia mak Xanana Gusmão, segundu José Ramos Horta, maibé sira na’in rua nia-huun no abut ida de'it, FRETILIN.
“Ami deside atu apoiu kandidatu FRETILIN nian mak Lu-Olo, atu halo fali justisa ba povu maubere, atu tau fila-fali buat hotu iha nia fatin”, dehan nia.
Tuir nia, husi kandidatu na’in ualu ne’e tau hamutuk, Lu-Olo mesak de’it mak iha kondisaun atu sai prezidente repúblika ba povu tomak.
Nia akresenta, kandidatu balun foin sai kandidatu atu sai prezidente promete ona atu muda konstituisaun. La'ós prezidente repúblika nia kompeténsia atu muda konstituisaun, hakarak atu muda konstituisaun, tenke kandidatu ba parlamentu.
“Signifika katak nia kontra konstituisaun no atu halo golpe ba konstituisaun”, katak Alkatiri.
Nia salienta, husi ne’e ba oin, tenke ukun atu hametin pás no estabilidade, haburas ekonomia no haburas dezenvolvimentu.
Entretantu eis Gerileiru Taur Matan Ruak rekoñese katak nia abut la’os FRETILIN, maibé nia konfesa defende FRETILIN liu fali abut FRETILIN sira.
“Ha’u nia abut la’os FRETILIN, mas ha’u defende FRETILIN liu fali imi FRETILIN abut sira,”Taur responde deklarasaun Alkatiri ne’e, bainhira hala’o sorumutu ho jornalista sira, iha Palasio Presidensial.
Nia realsa tan katak, Mari Alktiri mak uluk la halai ba liur, dala ruma funu loron ida de’it nia halai lakon de’it.
Antes ne’e, Taur Matan Ruak deklara publikamente katak, nia partidu maka Partidu Libertasaun Populár (PLP), tan ne’e prontu kompete ho partidu CNRT no FRETILIN iha eleisaun parlamentár 2017.
“Ha'u nia partidu maka PLP, entaun kuandu ha'u manan ha'u maka ukun governu. Hori-bainhira ha'u dehan ha'u sei ra'ut malu ho CNRT no FRETILIN,” dehan Taur.
