Iha nia karreira, obstaklu no dezafiu barak ne’ebé nia sempre hasoru, maibé fiar katak desizaun moruk husi Primeiru Ministru Taur Matan Ruak ne’ebé tenki hatoo proposta ezonerasaun ba Presidente Republika ne’e nuudar esperensia foun iha nia vida.

Maski nunee, ne’e laos mehi, maibé ne’e realidade ida nuudar ema politiku tenki hasoru konsekuensia husi desizaun politika ida ne’e.

Vise MS Elia husi partidu CNRT, koligasaun anterior Aliansa Maioria Parlamentar ne’ebé lidera husi Xanana Gusmão, kompostu husi partidu CNRT, PLP, KHUNTO,inklui UDT/FM.

Maibé koligasaun ne’e monu iha dalan klaran, partidu CNRT sai fali opozisaun ba nia Governasaun ne’ebé lidera husi Primeiru Ministru Taur Matan Ruak (Presidente PLP).

Maski nunee, membru Governu sira husi partidu CNRT sei mantein hala’o knaar too ohin loron. Hanesan mós Vise Ministra Elia, besik tinan rua ona nuudar membru Governu, servisu barak mak nia halo ona hodi servi estadu no povu iha rai ida ne’e liliu iha Ministériu Saúde.

Tristeza boot, sesta ohin (3/4), Primeiru Ministru tenki hatoo proposta lalais ba Prezidente Repúblika, Francisco Guterres Lú Olo no diferente de'it iha horas, PR dekreta kedas proposta ne'e hodi ezonera Vise-MS, karik tanba husi sala ne’ebé nia halo loron ida ka loron rua nia laran.

Maibé nia tenki simu realidade ne’e hodi husik nia kargu ho fuan boot nuudar jerasaun ida ne’ebé futuru sei nabilan liutan.

Desizaun ezonerasaun ne’e, Prezidente Repúblika, Francisco Guterres Lú Olo liuhusi dekretu prezidensiál númeru 30/2020, 3 Abril, aseita pedidu Primeiru Ministru Taur Matan Ruak kona-ba ezonerasaun Vise Ministra Kuidadu Saúde Primária, Élia Antonia dos Reis Amaral.

Dekretu ne’e tama iha vigor iha loron 3 Abril 2020. Katak, Vise Ministra Élina hahú iha loron ne’e la’ós ona hanesan membru governu ba governu dawalu lideradu Primeiru Ministru Taur Matan Ruak.

Primeiru Ministru hatoo pedidu ne’e ba Prezidente Repúblika, relasiona ho atetude negativu ministra saúde interina ne’e dezde hasoru krize pandemia coronavirus (COVID-19) no iha loron Kinta (2/4/2020) halo asaun kontra desizaun Primeiru Ministru Taur Matan Ruak hodi relata dadus covid-19, diferente ho dadus ne’ebé fó sai husi reprejentante Sentru Integradu Jestaun Krize (SIJK) COVID-19, Doutór Rui Maria de Araújo.

Aliende ne’e, Ministra Interina mós halo konfrontu ho jornalista sira, tanba hatoo dadus la konkretu no kompletu.