Governu ne'ebé lidera husi Primeiru Ministru Taur Matan Ruak aprezenta orsamentu hamutuk millaun $400 ba PN. Kompostu husi total osan ne’e, millaun $250 nuudar proposta levantamentu antes, ne’ebé fahe ba millaun $150 ba kombate Covid-19, millaun $100 ba reforsa kofre Estadu, no aumenta tan ho proposta adiionál ba covid-19 millaun $150.
Proposta adisionál ne’e ho millaun $150, ne’ebé hamosu iha deskusaun ho intensaun antisipa despeza hasoru Covid-19, inklui rekuperasaun atividade ekonómika.
Maibé Deputado sira kontinua mantein montante inisial ne’ebé Governo propoin antes ne’e ho total milllaun $250.
Rejultadu votasaun proposta lei orijinál husi Governu, maioria deputadu aprova ho votus unanimidade atu foti osan millaun $250.
Maibé, iha votasaun ba proposta adisionál millaun $150, deputadu husi Bankada CNRT, KHUNTO no PD kontra ho votus 33, FRETILIN no PLP a-favor ho votus 31, no na'in ida vota abstein.
"Proposta adisionál ne’e la liu, tanba rezultadu a favór 31, kontra 33 no abstensaun 1, maibé proposta levantamentu ho milaun $250 aprovadu ho votus 65," dehan Prezidente Parlamentu Nasionál, Arão Noé de Jesus da Costa Amaral iha PN, Kinta (02/04).
Vise Prezidente Bankada FRETILIN, Francisco Miranda Branco hatete, proposta adisionál milaun $150 ne’e pertinente hodi antesipa Covid-19, apoia vítima dezastre naturais no rekuperasaun ekonómiku.
“Ida adisionál ida ne’e importante atu rezerva, nune’e gabinete krize presiza bele jere hodi antesipa Covid-19 hodi responde ba situasaun ne’e, ami propoin aprova tán milaun $150,”dehan nia.
Prezidente Bankada Partidu Demokrátiku (PD), Antonio da Conceicão dehan, tenke iha planu didi'ak no kálkulu mai husi governu nian.
"Proposta ida ne’ebé mai husi governu ne’e mak realísitiku liu, tanba ne’e mak ha'u hanoin ita mantein ho proposta milaun $250 ne’e,” dehan nia.
Deputadu Bankada PLP, Noé da Silva hatete, apoia proposta husi bankada FRETILIN, tanba ema hotu preokupa situasaun tolu, situasaun polítika, inundasaun no Covid-19.
”Hanoin took, semana kotuk ita-boot sira dehan osan atu hira ita-boot sira apoia kombate Covid-19, maibé ohin ita-boot deside pozisaun oin seluk,” dehan nia.
Deputadu Partidu Demokrátiku, Adriano do Nascimento, hateten tau osan boot antesipa Covid-19 ne’e di'ak liu tán.
Nune’e karik situasaun ne’e mosu deputadu sira la presiza mai debate tan iha Parlamentu Nasionál no presiza duni osan boot hodi sosa medikamentu saúde.
Entretantu, Ministra Finansa interina Sara Lobo Brires hatete milaun $250 seidauk inklui ba despeza ba Covid-19.
“Iha millaun $250 nia objetivu atu reforsa ita-nia saldu tezouru, la’ós ba despeza Covid-19 no nesesidade emerjénsia sira seluk,” dehan nia.
