Kazu soe bebé iha Bekusse akontese iha fulan Agostu liu ba no foun liu mak kazu soe bebé iha Markoni ne’ebé akontese iha semana ne’e nia laran.

Ba kazu rua ne’e, Komandante Daruak PNTL, Komisáriu Faustino da Costa informa, prosesu ba kazu rua ne’e la’o hela.

“Kazu sira ne’e hotu prosesu ne’e la’o hela, to’o agora dadaun ne’e lori hela mate-isin ka bebé oan sira ne’e ba ospital depois atu bele halo autopsia,” dehan Komisariu Faustino hafoin hasoru-malu ho Prezidente Repúblika Francisco Guterres Lu Olo iha Palasiu Prezidensial, Bairro-pite, Kinta (06/09/2018).

Autopsia ne’e, nia hatutan, atu bele hatene bebé sira ne’e moris mai mate kedas ka sira moris maibé ema balun mak hamate sira.

“Agora maneira halo nusa atu buka katak ne’e see-see ninia oan ne’e polísia ninia servisu, ami mak sei hatene, ita-boot sira (jornalista) so hein rezultadu ba ida ne’e,” dehan Faustino.

Tuir nia, kazu soe bebé ne’e la’os akontese de’it iha fulan Agostu no Setembru nia laran, maibé akontese kada fulan.

“Ema soe bebé ne’e la’os akontese de’it iha fulan Agostu nia laran maibé atu dehan de’it iha Dili laran ne’e kuaze fulan-fulan ne’e iha (ema soe bebé),” dehan nia.

Molok ne’e, iha Kuarta (05/09), katuas ida ho idade tinan 70 sente hakfodak bainhira loke platiku ida ne’ebé so’e hela iha foer-fatin iha area Markoni. Iha bebé feto ida iha plastiku mean ne’e nia laran ho kondisaun laiha.

Katuas ne’ebé identifika ho naran José Pereira babain hala’o atividade buka hahaan fahi nian iha foer-fatin iha Dili laran ne’e la imajina dadeer ne’e bainhira nia sai husi nia hela fatin iha Kampung Alor ho karosa nia sei hetan bebé ida.

José informa, nia sai husi uma iha tuku 07:30 no bainhira to’o iha fatin-foer ida iha Markoni nia hare plastiku mean ida kesi metin no so’e hela iha foer-fatin.

“Ha’u hi’it plastiku ne’e todan loos. Ha’u hanoin ne’e hahaan restu, entaun ha’u kore plastiku ne’e, haree ba bebé ida maibe mate tiha ona,” informa nia fatin akontesimentu.

Hakfodak ho buat ne’ebé nia hetan, José bolu ema sira ne’ebé besik no ikus mai polisia forensik mai hodi lori ba ospital nasionál Guido Valadares.

Iha fatin hanesan, Xefe Suku Fatuhada, Marcelino Soares, lamenta ho asaun imoral ne’ebé halo husi ema ne’ebé laiha responsabilidade.

Tan ne’e, Xefe Suku ne’e dehan, nia sei revista kada uma iha Suku Fatuhada hodi identifika see mak so’e bebé refere.

“Ha’u prontu responsabiliza tama-sai uma iha Fatuhada hodi halo revista. Ema ne’e sei iha ne’e”, dehan nia.

Entretantu, espoza Prezidente Repúblika Francisco Guterres Lu Olo, Cidalia Mouzinho Nobre Guterres, sente triste tanba feto sira so’e bebé iha foer-fatin.

“Ha’u hanesan inan ha’u sente triste, ha’u sente la’os ha’u mesak mak triste maibé ha’u fiar ema hotu-hotu triste bainhira haree ema soe bebé,” dehan nia.