Hanesan públiku hatene, iha fulan Agostu nia rohan no inisiu fulan Setembru mosu kazu rua ne’ebé komete husi pesoal polisia. Kazu dahuluk akontese iha Bairro-pite ne’ebé komete husi pesoal polisia ho inisial DB ne’ebé baku feto ida no tiru mane ida, no kazu daruak akontese iha Delta Nova, iha ne’ebé pesoal polisia halo agresaun fiziku hasoru mane ida.
“Kazu ne’e (Delta Nova ho Bairro-pite) tama ona prosesu investigasaun,” informa Komandante Daruak PNTL, Komisáriu Faustino da Costa hafoin hasoru-malu ho Prezidente Repúblika Francisco Guterres Lú Olo iha Palasiu Prezidensial, Bairro-pite, Kinta (06/09).
Komisariu Faustino hatete, iha sorumutu ho Prezidente Lu Olo nia parte informa mós kona-ba kazu hirak ne’ebé akontese iha Dili, inklui kazu ne’ebé akontese iha Delta Nova no Bairro-pite.
Iha fatin ketak, Komandante Daruak PNTL Dili, Superintendente Asistente Euclidis Belo informa vitima Julia Chatulessy no Wilson Valdo Correia aprezenta ona keixa iha Komando polisia Kaikoli.
“Ami simu ona keixa vitima sira nian maibé ami orienta sira ba hato’o keixa formal iha eskuadra Dom Aleixo tanba area juridiku parte ne’ebá nian,” informa Euclidis.
Komandante ne’e dehan, Komando PNTL sei la defende ema ida maibé prosesu mak sei determina.
Ba pesoal polisia ne’ebé deskonfia envolve kazu, Euclidis hatete sei nafatin hala’o ninia knar nu’udar polisia hodi tau-matan ba establidade seguransa iha kapital Dili.
Tanba, nia dehan, iha mós lei balun ne’ebé mak fó dalan ba polisia atu defende nia aan rasik kuandu hetan asaun ameasa ba sira nia aan, entaun bele halao auto defeza,” katak nia.
Kronolojia Kazu Bairro-pite
Tuir kronolojia ne’ebé fó sai husi parte vitima sira katak, iha Kuarta (29/08/2018) maizumenus tuku 12:30 OTL, pesoal polisia ho inisial DB ba taka bola duir (bola guling) iha feira ba komemorasaun 30 Agostu ne’ebé realiza iha Aldeia Laloran, Suku Bairu-Pite, Postu Dom Aleixo, Dili.
Pesoal polisia ne’ebé ho kondisaun lanu ne’e lakon no hahú haksesuk-malu ho joven sira, nune’e hanesan membru komisaun organizadora, Julia koko atu intervene hodi husu ba parte rua atu rezolve ho ulun malirin, maibé pesoal ne’e hahú hasai lia-tolok.
Haree ba situasaun ne’ebé hahú manas, pesoal polisia na’in tolu seluk ho inisial A, BM no AC hakbesik aan. Haree prezensa husi nia maluk na’in tolu ne’e, DB kaer la metin no hahú halo agresaun fiziku hasoru Julia.
“DB baku Julia nia kanuruk dala ida no tuku nia matan dala ida. vitima sente oin nakukun,” informa reprezentante Asosiasaun HAK, Evangelino Gusmão, liu husi konferensia imprensa iha Asosiasaun HAK, Farol, Kuarta (05/09/2018).
Haree nia bin ema baku, Wilson hakat mai ho intensaun atu sori maibé pesoal polisia na’in haat hahú halo agresaun fiziku no DB losu nia pistola ne’ebé nia sikat iha kanotak. Haree ba ida ne’e, Wilson halai no DB tiru vitima nia kelen parte loos.
La to’o ne’e de’it, DB kontinua hakat ba hodi see pistola ba Wilson maibé la konsege tiru tanba ema taka netik. DB ne’ebé haree Julia koko defende nia alin hasai lia-tolok ba feto ne’e.
“Sorte o feto, lae in* h*** k*** ha’u tiru mate tiha kedas o,” dehan Evangelino hodi hasaran lia-fuan husi DB.
Hafoin asaun tiru ne’e, atividade feira labele kontinua no komunidade sira ne’ebé partisipa halai namkari. Haree ba ida ne’e pesoal polisia na’in haat ne’e estraga sasan iha feira.
Tuir vitima sira aleinde sasan ne’ebé hetan estragus, sira-nia osan ho valor $200 mós lakon.
Kronolojia Kazu Delta Nova
Mate-restu 12 Novembru 1991 ida ho naran Andre Rangel Gomes hato’o duun pesoal polisia ida halo agresaun fiziku hasoru nia.
Tuir informasaun husi Andre ne’ebé konsidera aan hanesan vitima, kazu ne’e akontese iha ninia primu nia festa kazamentu iha Salaun Delta Nova iha Domingu (02/098/2018) tuku 03:00 madrugada.
Andre hatete, kazu ne’e hahú bainhira nia primu ne’ebé nu’udar membru Unidade Maritima istori-malu iha festa laran ho pesoal F-FDTL ida. Sira na’in rua dada-malu ba li’ur no membru F-FDTL harahun botir hodi uza sona Andre nia primu. Maibé, nia tahan no rezulta nia liman kanek.
Haree ba ida ne’e, Andre dehan, nia ba husu nia primu no nia primu hatudu mane ida hatais faru mean mak koko sona nian. Nune’e, Andre hakbesik an ba hodi koalia ho ema ne’e. Tanba sira-nia lian hahú aas, membru polisia sira ne’ebé simu kontaktu hodi ba halo seguransa baku lesuk Andre.
“Seidauk baku malu, sei ko’alia maka’as ba malu, sira (pesoal polisia ida) mai no komesa tuku ha’u, depois sira seluk mós ataka kedas ha’u,” informa Andre iha edifisiu Asosiasaun HAK, Farol-Dili, Segunda (03/09).
Andre hatete, nia la koñese pesoal polisia sira ne’ebé baku nia tanba iha momentu ne’ebá nia ho kondisaun lanu todan, maibé nia hatene polisia mak baku nia tanba uza roupa metan.
