Segundu Komandante PNTL Munisípiu Dili, Superintendente Asistente Euclides Belo dehan, Komandu PNTL husu ba família vítima hodi koordena malu ho Interpol hodi buka tuir restaurante na’in ne’ebé deskonfia fó venenu ba matebian Judite da Costa Silva.
Nia dehan, Komandu PNTL Munisípiu Dili hamutuk koordena ho parte investigasaun inklui Servisu Informasaun Polisia (SIP) hodi lansa informasaun buka tuir na’in ba restaurante ne’e nia paradeiru.
“Ita instala ona Interpol, kuandu suspeitu halai ba li'ur ona ami sei koordena ho Interpol hodi buka Paul Steven Do ho nia kaben Rita”, dehan Euclides iha Komandu PNTL Munisípiu Dili, Kaikoli, horisehik.
Tuir nia, suspeitu ne’e seidauk halai ba rai li'ur, maibé entidade balun ne’ebé asegura hela nia iha fatin ida. Ne’e duni, presiza iha kolaborasaun ne’ebé feitu atu kaer lalais restaurante na’in ne’e.
Polisia halo ona pasa revista ba rezidénsia rua ne’ebé identifika fatin ba patraun ne’e hanesan Fatuhada no Timor Plaza, maibé uma rua ne’e mamuk no taka metin.
Iha informasaun ne’ebé jornalista ne’e rekolla, Restaurante na’in Paul Steven Do irlandés ne’ebé hela kleur iha Austrália ho nia espoza Rita husi Indonézia.
Traballadora restaurante Food L-Do, iha Timor Plaza CBD 3, Judite da Costa Silva, ne’ebé mate, iha Sesta (7/4), deskonfia hetan oho husi ninia patraun rasik.
Tuir informasaun husi Polisia Nasionál Timor-Leste (PNTL), Judite ezije ba patraun atu labele ko'a ninia saláriu, maibé tanba la kontente ho preokupasaun ne’e, entaun ikus mai deskonfia empregadór fó venenu ba vítima.
Entretantu, versaun husi família matebian katak, problema ne’e akontese tanba vítima Judite ezije ba patraun kona-ba ninia saláriu ne’ebé kompañia ko'a. Antes ne’e, simu osan mensál $650, maibé derrepente hatún ba $400.
Ne’e duni, matebian la simu no husu ba kompañia Central Food L-Do iha Fatuhada atu halo karta demisaun. Nune’e, vítima ho nia kaben José da Cruz ba fali iha restaurante Food L-Do iha Timor Plaza hodi entrega ekipamentu servisu nian, maibé derrepente matebian ne’e monu iha restaurante laran.
Mate-isin vítima nian halo ona prosesu autópsia no entrega fila-fali ba família matebian hodi halo prosesu funerál.
