Segundo Komandante PNTL Munispiu Dili, Superintendente Asistente Euclides Belo dehan, prosesu investigasaun kontinua la’o nafatin maibé nia parte sei hein delagasaun mandadu Husi husi MP.

“Ami (PNTL) sei la hamrik mesak maibé ami hein desizaun husi Ministériu Públiku hodi promove kazu ne’e atu bele ka’er tiha patraun Food L-Do,” dehan Euclides ba Jornalista sira iha Komando PNTL Munisipiu Dili, Segunda (17/4).

Euclides dehan, bainhira MP hatun ona mandadu, PNTL sei ezekuta.

Tan ne’e, nia husu ba MP atu promove hodi aplika lalais mandadu kapturasaun nune’e PNTL bele buka tuir suspeitu ne’ebé deskonfia hamate Judith.

Molok ne’e, tuir informasaun husi Polisia Nasionál Timor-Leste (PNTL), Judite ezije ba patraun atu labele ko'a ninia saláriu, maibé tanba la kontente ho preokupasaun ne’e, entaun ikus mai deskonfia empregadór fó venenu ba vítima.

“Kazu ne’e akontese entre patraun ho traballadora. Informasaun ami rekolla katak patraun lakohi hasa'e vítima nia saláriu, tanba ne’e maka patraun halo venenu ba nia traballadora,” dehan Segundu Komandante PNTL Munisípiu Dili, Superintendente Asistente Euclides Belo, iha Kristu Rei, horisehik.

Tuir kronolojia husi PNTL nian, vítima levanta problema ne’e to’o iha patraun nia uma, maibé la hetan solusaun. Entaun empregada ne’e fila-fali ba servisu fatin, to’o iha ne’e maka derrepente nia monu. Nune’e, konsege lori ‘halai’ ba ospitál maibé la konsege salva.

Entretantu, versaun husi família matebian katak, problema ne’e akontese tanba vítima Judite ezije ba patraun kona-ba ninia saláriu ne’ebé kompañia ko'a. Antes ne’e, simu osan mensál $650, maibé derrepente hatún ba $400.

Ne’e duni, matebian la simu no husu ba kompañia Central Food L-Do iha Fatuhada atu halo karta demisaun. Nune’e, vítima ho nia kaben José da Cruz ba fali iha restaurante Food L-Do iha Timor Plaza hodi entrega ekipamentu servisu nian, maibé derrepente matebian ne’e monu iha restaurante laran.

“Derrepente staff sira halai sai mai dehan ha’u nia-ferik oan monu. Ha’u to’o ba ferik-oan la ko'alia tiha ona no latan hela iha rai, nune’e ha’u ho staff Food L-Do ida halai la-lais tula iha karreta lori ba HNGV”, dehan nia.

Pesoál saúde sira monta oksijéniu ba matebian maibé la konsege salva ninia vida.

Entretantu, Xefe Emerjénsia HNGV, Luciana Celeste Amaral hateten, matebian Judite mai tama iha sala emerjénsia ho kondisaun la estavel, tanba laiha konxiénsia ona hafoin lori sai husi ninia servisu fatin.

Nia dehan, to’o iha sala emerjénsia matebian la book-aan ona no hasai kaben husi ibun.

Mate-isin vítima nian halo ona prosesu autópsia no entrega fila-fali ba família matebian hodi halo prosesu funerál.

Entretantu, membru PNTL ne'ebé la fó sai nia identidade ba jornalista katak, daudaun ne’e patraun halai lakon ona.

Tuir nia, antes ne’e, patraun ne’e mós envolve iha kazu hanesan iha Audi'an tinan ida liubá.

Iha Sábadu (8/4), família matebian ho polisia ba iha restaurante ne’e, maibé fatin ne’e taka.

Nune’e, sasin ida ne’ebé haree ho matan vítima ne’e monu iha restaurante ne’e mós ba ona ninia munisípiu.