×

Atenção

JUser: :_load: Não foi possível carregar usuário com ID: 430

Fulan Tolu, Asidente Trafiku 241 iha Dili Featured

By Tome Amando Outubru 16, 2018 8531
Ilustrasaun asidente trafiku. FOTO: Meetdoctor.com Ilustrasaun asidente trafiku. FOTO: Meetdoctor.com

DILI: Tuir dadus husi Unidade Polisia Tranzitu Munisipiu Dili, iha fulan tolu nia laran mosu asidente trafiku 241 iha Kapital Dili.

Bazeia ba relatoriu trimestral, fulan Jullu to’o Setembru 2018, husi Polisia Tranzitu hatudu katak asidente iha Kapital Dili sa’e kompara ho fulan hirak kotuk.

Komandante Daruak PNTL Dili, Superintendenti Asistente Euclides Belo hatete asidenti trafiku kategoria ba kazu tolu (3); kazu mate, kanek todan no kanek kaman.

Ba kazu mate, nia dehan, polisia rejista ema na’in sia (9); fulan Jullu na’in haat (4), Agostu na’in ida (1), no Setembru na’in haat (4).

Kanek todak hamutuk na’in 30; fulan Jullu na’in 10, fulan Agostu na’in 12, no fulan Setembru na’in 8.

“Ba kazu kanek kaman laiha klasifikasaun maibé total mak na’in 174,” informa Euclidis.

Husi kazu hirak ne’e, nia dehan, polisia halo ona prosesu ba kondutór na’in 30, na’in 10 ba tribunal hodi submete interogatoriu dahuluk no na’in 20 rezolve tuir dalan familia.

Kona-ba motivu husi kazu asidente, nia dehan, maioria kazu asidente akontese tanba kondutór laiha konsentrasaun bainhira kondus kareta, balun tanba travaun kareta la di’ak, no iha mós failansu sira seluk.

“Husu ba kondutór sira bainhira lori karreta presiza konsentrasaun, kuandu sente matan dukur ka lanu, di’ak liu deskansa atu nune’e labele hamosu asidenti,” nia husu.

Aleinde ne’e, nia husu atu tenke kontrola kondisaun karreta molok atu sai ba fatin ruma.

“Se sente iha failansu ruma ho kareta ne’ebé atu hala’o operasaun iha sidade ka iha minisipiu, di’ak liu buka rezolve kedas, nune’e bele asegura vida kondutór rasik, inklui pasajeiru sira ne’ebé mak sa’e tuir kareta,” dehan nia. 

Rate this item
(0 votes)

Independente Digital TV