Ho nune’e signifika katak polisia tenke liberta suspeitu na’in lima ne’ebé sira kaer iha 10 Outubru foin lalais.

Iha Sabadu (13/10), Polisia Servisu Investigasaun Kriminal (SIK) Munisipiu Dili lori arguidu na’in 5 ba tribunal molok tuku 10:00.

Maibé Ministériu Públiku (MP) la marka prezensa atu promove arguidu sira ba Tribunal hodi submete ba interogatoriu dahuluk.

Defeza husi arguidu, Gil Amaral hatete, tuir lei, interogatoriu dahuluk labele liu oras 72, konta husi oras ne’ebé polisia kaptura suspeitu.

“Polisia kaer sira iha tuku 9:00 maibé liu tiha ona oras 72. Sira adianta tiha ona oras rua molok aprezenta ba tribunal tanba ne’e tenke liberta,” deklara defeza ne’e iha Tribunal foin lalais ne’e.

Maske tribunal liberta ona, maibé Gil dehan la signifika sira livre ona husi prosesu sira ne’e.

“Prosesu investigasaun kontinua lao. Tempu ida Tribunal sei bolu fali sira atu hala’o fali prosesu investigasaun ba oin. Laos Tribunal liberta ona sira, ne’ebé prosesu hotu, lakon ona, ne’e la loo,” dehan nia.

Molok ne’e, ofisial polisia ida ne’ebé lakohi públika ninia identidade informa, iha Tersa (09/10) Polisia Servisu Investigasaun Kriminal Munisipiu Dili simu tan mandadu detensaun husi Tribunal Munisipiu Dili (TMD) hodi halo tan kapturasaun ba joven na’in lima.

Nia dehan, TMD rasik mak indika atu polisia halo kapturasaun ba ema na’in lima seluk relasiona ho kazu omesidu agravadu hasoru Carlos da Costa ne’ebé akontese iha Hera iha 9 Setembru 2018.

“Orden (detensaun) ne’e sei ezekuta iha loron 10 Outubru dader maizumenus tuku 09:00,” informa fonte ne’e horseik.

Ho kapturasaun ba na’in lima ne’e signifika sei iha suspeitu na’in sia mak tuir prosesu justisa ba kazu oho Carlos iha Hera.