Tuir Rotilio, nia motor ho marka Revo Fit, xapa matrikula D.8246 nia para iha semiteriu Bekusi maizumenus tuku 17:00 hodi ba kari aifunan loron 40 husi nia viziñu ida.
“Ha’u para motor hamutuk ho motor sira seluk iha portaun parte leste. Ha’u-nia motor para iha klaran kedas, maibé volante mak ha’u la xave. Tau tiha aifunan hotu ha’u sai mai motor laiha,” dehan Rotilo iha semiteriu Bekusi, Domingu (14/10/2018)
Bainhira haree motor laiha, Rotilo dehan, nia la sente hakfodak tanba hanoin kolega balun mak halimar hodi subar nia motor. Maibé bainhira nia kolega sira mai hotu no nia husu, sira hakfodak.
Hafoin buka iha area semiteriu nian no la hetan rezultadu, Rotilio ho apoiu husi nia kolega balun hakat ba edifisiu polisia hodi hato’o keixa.
Iha Segunda (15/10) tuku 10:00, vitima hakat fali ba Komando PNTL Kaikoli hodi hato’o fila fali keixa no entrega dokumentu motór nian ba polisia tranzitu.
Komandante daruak PNTL, Superintendenti Asistente Euclides Belo informa katak polisia planu ona atu monta CCTV iha area semiteriu Bekusi iha tinan oin.
Maibé molok instala, nia husu ba motorista sira atu bainhira para sira-nia motor tenke haree fila fali sira xave ona motor nia volante ka seidauk.
Nia dehan, Komando simu ona keixa husi vitima no sei orienta nia membru hodi halo operasaun atu buka tuir motor ne’ebé lakon.
