Grupu Arte-Marsiál Ameasa Komunidade Área DIT Featured

By Tome Amado Outubru 18, 2018 6831
Ilustrasaun Grupu Arte-Marsiál. FOTO: Kompas.Com Ilustrasaun Grupu Arte-Marsiál. FOTO: Kompas.Com

DILI: Tensaun konflitu iha Dili ikus-ikus ne’e sa’e makaas. Identifika ona iha área balun mosu ema tuda-malu no hana-malu hanesan iha Mascarenhas, Fatuhada, Beto, Lahane no Luru-Mata.

Nune’e, área balun ne’ebé identifika hetan ameasa husi grupu arte-marsiál maka komunidade iha área eskola superiór Dili Institute Technology (DIT).

Asaun ne’ebé grupu ne’e lansa maka ameasa ema sira ne’ebé hela iha área ne’e no mós impede movimentu transporte iha fatin ne'ebá.

Kona-ba área ne’e rasik, autoridade koopera hamutuk ho autoridade lokál sira hodi halo identifikasaun ba membru grupu arte-marsiál ne’ebé halo ameasa para polisia bele halo atuasaun hasoru sira.

“Ema ida atu ameasa ema seluk nia vida, ne’e krime. Tan ne’e husu ba membru arte-marsiál ne'ebé de’it atu la halo asaun ne’e”, dehan Segundu Komandante PNTL Munisípiu Dili, iha servisu fatin, Kaikoli-Dili, horisehik.

Nia fó korajen ba komunidade iha área DIT atu koopera ho polisia inklui autoridade lokál no membru Konsellu Polisiamentu Komunitaria (KPK) sira, kuandu haree kualkér ema ruma ka membru grupu arte-marsiál ida mak hala'o asaun ameasa ne’e suspeita kedas nian hodi entrega ba Polisia.

Nune’e, aviza mós ba komunidade sira labele sai adeptu ba hahalok krime sira ne'ebé akontese iha bairru laran. Hahalok ne'ebé la kontribui ba estabilidade tenke buka halakon kedas, labele husik buras.

Komandu PNTL mós halo ona vizibilidade iha Dili hahú, Segunda (16/10), kalan. Membru polisia sira la’o ain tama-sai bairru, balun ho karreta no balun ho motór, atu kontrola di'ak liu tan situasaun iha Dili.

Fatin hirak ne’ebé sai risku ba konflitu arte-marsiál maka hanesan Mascarenhas Aldeia 03, 02, 04 no 06, liu-liu aldeia 03 ho 06 mak makas liu. Maski nune’e, operasaun intensivu konsege asegura situasaun ne’e.

Nune’e, iha Luru-Mata, Fatuhada no Beto mós mosu konfronta tuda malu, maibé Polisia hetan apoiu husi Unidade Batallaun Orden Públiku (BOP) normaliza hikas situasaun.

Rate this item
(0 votes)

Independente Digital TV