Deputadu César Valente hatete, informasaun kona ba membru PNTL no FFDTL ne’ebé asegura jogu ilegál iha tempu kalan ne’e la’os foin akontese, maibé  dala barak ona.

Iha tinan 2012 to’o 2014 informasaun ne’e mosu iha fatin-fatin relasiona ho asegurasaun ba jogu ilegál sira  ne’e.

Maibé iha tinan 2015 to’o 2016 informasaun ne’e lakon iha públiku tanba hetan presaun husi  superiór sira ate membru balun sai kondenadu.

Agora informasaun ne’e mosu fila fali ona, ne’e superiór sira tenke foti  medida hodi identifika no investiga membru ida ne’ebé envolve iha asaun indixiplina tenke hare didi'ak hodi akuza sira ho regulamentu instituisaun nian, hodi eduka sira atu bele hatene sira nia funsaun loloos.

César dehan, membru sira ne’ebé deskonfia asegura jogu ilegál  ne’e balun iha grupu no balun individuál hodi asegura jogu atu nune’e labele mosu problema kuandu jogu ne’e la’o.

Membru sira ne’e deskonfia organizadu tanba sira servisu hamutuk ho Autór ba jogu ilegál.

Bainhira membru sira ne’ebé ho karreta parlamentu  halo patroli iha tempu kalan, sira iha ona esperiénsia.

Bainhira  karreta apita husi do’ok entaun  kariawan bola-guling ba hein ona hodi fó osan.

“Asuntu ne’e ami informa beibeik ona ba Komandu atu halo efetivu liu tan servisu informasaun polisia, tenke la’o atu nune’e bele deteta lalais hodi halakon informasaun at sira ne’e iha públiku”, dehan Pilotu iha PN, Segunda horisehik.

Servisu informasaun polisia  importante tebes atu bele hala’o kna'ar ho transparénsia hodi servisu tuir duni lei no orden, foin bele deteta asaun sira hanesan ne’e iha terenu se lae difisil atu deteta.

Tanba ne’e nia husu ba Komandu atu halo kontrolu ba nia memru sira ne’ebé  indixiplinadu hare mak sira komete tenke fó sansaun rigorozu.

Sei bele hasai tiha husi instituisaun tanba sira ne’e la merese atu sai servidór ba instituisaun no estadu.