Nia mak suspeitu asasinatu ne’ebé oho ferik ida ho naran Victória Soares no taa kanek ema na’in sia (9), iha Postu Administrativu Laklubar, Manatutu, Kuarta (22/3).
Tuir kronolojia ne'ebé konta husi família matebian José Quintão, hafoin António fila husi rate maizumenus tuku 03:00 madrugada, nia foti katana no ba nia tia sira nia-uma hodi taa família sira ne’e ida-ida.
“Suspeitu ne’e mós la lanu ida. Ema ne’e derrepente foti katana mai taa nia família rasik”, dehan José Quintão, iha Hospital Nasionál Guido Valadares (HNGV), Sesta (24/3).
Hafoin akontesimentu ne’e, iha tuku 07:00 dadeer Polisia Laklubar nian to’o kedas iha fatin akontesimentu hodi halo investiga ba suspeitu. To’o tuku 10:00, PNTL Manatutu evakua kedas vítima na’in 9 ne’e no matebian Victória mai iha HNGV.
Husi vítima na’in sira ne’ebé hetan taa, na’in ida oras ne’e daudaun baixa hela iha sala ICU, nune’e na’in ualu seluk baixa iha sala Cerurgia homens.
Iha fatin hanesan, bei-oan husi matebian, Luis Sarmento hatete, husu ba parte seguransa presiza halo investigasaun kle'an, tanba oho no taa kanek nia-família.
Entretantu, Xefe Departamentu Emerjénsia, Nilton do Carmo da Silva hateten, deskonfia suspeitu António ‘Darelau’ Soares moras metál, tanba ne’e bele oho ema no taa kanek ema na’in sia.
