Ata ne’ebé nudar inan husi Ali sente nervozu tanba Aho ne’ebé nudar aman hapara ninia intensaun atu lori halai sira-nia oan, nune’e Ata tuku dala rua iha Aho nia matan-fukun parte loos ne’ebé rezulta Aho nia-matan bubu.

Aho ho Ata moris hamutuk nudar fen ho laen iha tinan 1999. Husi sira nia domin ne’e, sira hetan oan na’in neen (6). Maibé, iha tinan 2015, Aho ho Ata deside hodi hakotu sira-nia relasaun. Oan na’in neen (6) hela hamutuk ho Ado.

Tuir akuzasaun husi Ministériu Públiku ne’ebé Tribunál lee sai katak, iha 1 Novembru 2016 arguida (Ata) ho nia alin mane tun husi Fatulia, Ermera mai Dili. Hafoin to’o iha lezadu (Aho) nia uma oin, arguida haruka nia alin para motor no arguida haree nia oan Ali halimar hela iha uma oin. Arguida tuun husi motor ba kous Ali hodi tula iha motor maibé lezadu halai husi uma-laran hodi hada’u tiha labarik husi arguida.

Nune’e, MP dehan, arguida tuku dala rua iha lezadu nia matan-fukun parte loos to’o bubu. Ho hahalok ne’e, lezadu ba halo tratamentu iha ospital durante semana ida nia laran.

Ho arguida nia hahalok ne’e MP akuza arguida komete krime ofensas integridade fizika simples ne’ebé previstu no punidu iha artigu 145 kodigu penal Timor-Leste.

Hatan ba akuzasaun ne’e, arguida dehan akuzasaun ne’e balun loos no balun la loos.

Nia hatete, nia ba kous duni labarik maibé derrepente de’it lezadu mai hodi halo agresaun fizika hasoru nia nune’e nia hisik liman no kona lezadu nia matan-fukun.

Iha fatin hanesan, lezadu deklara katak momentu ne’ebé tamba arguida atu foti labarik la ho ninia koñesimentu nuudar aman.

Lezadu dehan, arguida tenta hada’u labarik no halo agresaun fizika hasoru lezadu.

Hafoin rona deklarasaun ne’e, Tribunal submete ba iha alegasaun final. Iha alegasaun final MP husu ba Tribunal atu aplika pena prijaun fulan 5 no suspende ba tinan 1 fulan 6.

Entretantu, parte defeza husu ba Tribunal atu aplika pena ne’ebé adekuadu tanbaaarguidu halo lezadu nia matan fukun nakles la ho intensaun hodi hakanek.

Rona tiha deklasaun ne’e Tribunál adia julgamentu ba 28 Marsu 2017 tuku 14:00 loraik hodi rona desizaun final.

Audensia julgamentu ne’e prezide husi Juiza Singular Edite Palmira, MP reprezenta husi Prokuradora Ivonia Gutteres, no arguida hetan asistensia legal husi Advogada Privada Silvia Vieira.