Kazu ida ne’e mak akontese ba inan ida, bolu de’it Ama Bia (la’os naran loos), ne’ebé tenek ba hatan iha Tribunal Distrital Dili (TDD) tanba baku nia oan rasik, Mau (la’os naran loos).

Liu husi audensia julgamentu iha TDD, Kuarta (22/03), Ministériu Públiku (MP) akuza Ama Bia hanesan autora material ba krime Violensia Domestika tuir artigu 145 kodigu Penal Timor-Leste.

Tuir akuzasaun husi MP ne’ebé Tribunál lee sai katak, iha 2 Jullu 2016 iha Vila-Verde, Mau halimar hela ho nia subriñu iha uma oin. Mau tebe agua hodi kona nia tian, nune’e Ama Bia bolu Mau tama ba uma laran, foti ai pedasuk baku Mau nia liman no ulun, no kontinua atu fahi Mau nia kakorok.

Hatan ba akuzasaun ne’e Ama Bia deklara katak, iha momentu ne’e nia lori Mau ba kuartu laran no baku Mau nia liman ho rotan la’os ai pedasuk no la fahi Mau nia kakorok.

Ama Bia dehan, nia nervozu tanba moe ho lia-fuan husi Amau nia tian ne’ebé hatete ‘inan-aman la hanorin’.

Iha fatin hanesan, Mau dehan ba Tribunál katak, Ama Bia baku nia liman no ulun ho rotan no ran sai barak.

Audensia julgamentu ne’e prezide husi Juiz Singular Eugebio Xavier, Ministériu Públiku reprezenta husi Prokuradór Ivoni Guterres, no arguida hetan asistensia legal husi Defensór Públiku Humberto da Silva.