DILI: Arguidu Americo Casmiro tenke hatan nia hahalok iha Tribunál Distritu Dili (TDD) tanba komete krime hasoru nia oan rasik.
Ministériu Públiku (MP) akuza arguidu sai hanesan autór material ho forma kusumadu ba krime violensia domestika no forma ofensas ba integridade fiziku simples ne’ebé previstu iha artigu 145 kodigu penal Timor-Leste.
Tuir akuzasaun husi MP, iha 19 Maiu 2015 maizumenus tuku 9:30 dader iha Kintal Boot, arguidu baku-malu ho nia kaben (lezada nia inan) Guilermina do Rego, nune’e Guilermina entrega lezada nia alin ba lezada hodi kous.
Simu tiha labarik ne’e, lezada ba hamriik dook, la kleur arguidu halai ba lezada atu kous lezada nia alin, maibé lezada lakohi entrega labarik ne’e ba arguidu, nune’e arguidu tuku dala ida iha lezada nia keixun no rejulta lezada hetan kanek iha nia ibun no nia keixun bubu.
Rona akuzasaun ne’e, arguidu deklara ba Tribunál katak faktus ne’e loos hotu.
“Ha’u husu atu kous labarik, maibé lezada la fó haú, tanba ne’e mak ha’u tuku dala ida iha lezada nia keixun to’o nakles,” hatete arguidu.
Rona tiha deklasaun, MP iha ninia alegasaun husu ba Tribunál atu fó pena prizaun tinan ida (1) suspende ba tinan rua (2).
Entretantu, Defensór Públiku husu ba Tribunál atu fó pena ne’ebé mak adekuadu tanba arguidu arepende nia sala no promete iha futuru sei la halo tan.
Rona deklarasaun hirak ne’e, TDD deside hodi adia fali julgamentu ba 27 Fevereiru hodi rona desizaun final.
Audensia julgamentu ne’e prezide husi Juiz Singular José de Araujo Maria. MP reprezenta husi Prokuradór Ivonia Guterres no arguidu hetan asistensia legal husi Defensór Públiku José da Silva.
