Preokupasaun ne’e, Povu Agostinho Guterres sira hato’o ba Prezidente Repúblika Taur Matan Ruak durante hala’o diálogu aberta.
Agostinho dehan, durante ne’e, sira haree iha media, servisu MKIA fó apoiu fundus ba negosiante lubuk ida hodi kria grupu kooperativa hodi dezenvolve sira nia atividade negósiu.
Nia dehan, durante ne’e sira tenta atu hato’o proposta ba MKIA, maibé nu’udar povu kbiit sira arraska atu lori proposta ne’e ba governu.
“Ko’alia kona-ba hadi'a ekonomia família, ami rona Ministériu Komérsiu Indústria no Ambiente (MKIA) halo kooperativa, se bele suku hotu tenki halo kooperativa para hotu-hotu bele tama iha ne’ebá,” dehan Agostinho, Kinta (02/02).
Tuir nia katak, povu Bidau mós presiza estabelese grupu kooperativa hodi sira bele dezenvolve sira nia moris ho di’ak.
Nia hatutan, atu harii kooperativa la’ós haree ba osan de’it, maibé se mak iha animál bele envolve mós iha laran hodi bele fa’an ba hetan osan atu nune’e bele hadi'an moris.
Tanba Timor ne’e funsionáriu hotu mós hanesan ne’e, nia osan iha mós kuandu hotu tiha ne’e deve de’it, tanba ne’e presiza harii kooperativa no presiza formasaun, tanba ko’alia kona ba kooperativa tenki iha formasaun, ida ne’e bele hadi'a ekonomia iha família Hataan ba preokupasaun ne’e, Prezidente Repúblika Taur Matan konkorda ho ideia no sei husu ba governu atu haree kestaun ne’e.
“Ha’u konkorda ho maun nia ideia ne’e, tanba iha Timor ha’u la’o hotu, iha esperiénsia ha’u haree katak, kooperativa iha suku, iha ida de’it maka iha Lospalos Iliomar, maibé grupu barak ona. Maibé iha grupu ida que koñesidu liu ne’e iha Maliana, ne’e grupu feto ne’ebé lidera husi señora Domingas, grupu ho naran, ‘LANAMONA’ Lakon Nakukun Mosu Naroman,” dehan Taur.
Taur dehan, grupu kooperativa feto iha Maliana ne’e, sira harii ho fundus kuaze $300. Agora grupu ne’e nia kooperativa la'o daudaun, no sira iha kapasidade para bele fó kréditu ba membru sira to’o rihun $10.
“Mas tambem que ita haree kooperativa señór Elizário nian, harii ho orsamentu boot,” tenik nia.
Nia dehan, Timoroan tenke harii grupu kooperativa barak para bele dezenvolve negósiu ki'ik sira hodi suporta ekonomia TL.
