Oras ne’e daudauk sasán rikusoin Timor nian balun iha tasi no foho Jaco hanesan manu fuik ema balun hahú estraga no foti ona sasán importante balun.

“Ita iha beleza naturál inklui animál úniku hanesan manu mate klamar ne’ebé ho modelu uniku iha ninia prosesu moris tanba bainhira atu tolun nia tenki kee rai barak tanba ne’e ha’u ba sei ko’alia ho Ministériu Interiór hodi bele monta postu seguransa próteze ilha ne’e, ”informa Ministru  Koordenadór Asuntu Ekonómiku no Ministru Agrikultura no Peskas (MEKAE), Estanislau da Silva ba jornalista sira hafoin hala’o vizita hale'u illa Jaco Tutuala, foin lalais ne’e.

Ilha Jaco animál fuik oin-oin de’it hanesan, rusa, manu mate klamar, no ikan sira iha tasi sai hanesan rikusoin ba Timor nian tenke proteje sira nia konservasaun moris.

Ho rikusoin furak sira ne’e, bele atrai turista internasionál no lokál hodi vizita ba haree sentru turizmu Jaco nian furak.

Iha vizita ne’e, MEKAE konvida mós Sekretaria Estadu Arte no Kultura, Maria Isabel de Jesus atu haree programa servisu dezenvolve turizmu komunitaria iha Jaco.

Jaco Sai Fatin Beleza Úniku Iha TL

Governu Timor-Leste konsidera ilha Jaco sai hanesan fatin istóriku iha tempu uluk too agora.

Ilha Jaco ho nia modelu rai kabuar ne’ebé nakonu ho rai henek mutin no halo animál fuik oin-oin moris barak ne’ebá sai nu’udar sentru turizmu atu hatama reseita ba estadu, bainhira governu dezenvolve ona fatin ne’e.

“Fatin turizmu importante tebes atu dada turista mai vizita sai hanesan beleza naturál ida ne’ebé úniku ba Timor, ami iha preokupasaun boot atu próteze,” dehan Ministru Estanislao

Governu halo ona dekretu lei ida atu bele próteze  rikeza naturál hodi bele fó benefísiu estadu no populasaun ne’ebé hela besik.

Governu sei dezenvolve kondisaun infraestrutura bázika  hanesan bee moos, estrada, restaurante no otél sira.

MAP rasik iha tempu besik sei koloka tan Membru Guarda na’in 3 hodi bele tau matan liu tan ba ilha Jaco hodi asegura seguransa povu labele oho rusa fuik no animál sira seluk.

Tuir planu iha tempu besik MOP sei koloka ekipamentu pejadu atu hadi'a estrada hosi Lauten tun ba Jaco.

Nune’e mós, Sekretária Estadu Arte no Kultura (SEAK), Maria Isabel dehan, sira la;o ba haree fatin ne’e ho planu estratéjiku ho ministru ekonomia nian atu hadi'a fatin turizmu ho di’ak liu.

Parte turizmu nian komesa hadi'a ona fatin istóriku sira iha munisípiu sira haree ba infraestrutura bázika ministériu sempre iha koordenasaun hodi bele hadi'a kondisaun hotu.

Entretantu Administrador Postu Tutuala, Carlito Pereira hatete, agora tama ona ba faze deskonsentrasaun administrativa haree ba seguransa fatin turizmu nian liu husi delegasaun servisu ninian.

“Atu hadi'a área turizmu presiza servisu hamutuk ho governu hodi bele hadi'a di’ak liu tan atu nune’e bele dada turista sira mai vizita,” tenik nia.

Durante ne’e sira nia parte mós  halo regulamentu hodi bandu komunidade lori kilat manu tiru mate rusa no manu fuik sira iha ai laran.