Governu la promete atu envolve emprezáriu sira hodi sosa asaun ConocoPhillips nian, maibé husu atu sira hadi'a-aan hodi bele sai empreza ne’ebé profisionál.
“Ami seidauk fó resposta ida (sosa asaun ConocoPhillips). Saida maka ha’u bele husu ba emprezáriu timoroan sira prepara aan didi’ak”, dehan Xefe Governu, iha Palásiu Prezidensiál, Bairru-Pité, Kinta (18/10).
Ne’e duni, PM Taur husu ba emprezáriu sira atu servisu profisionál, ko’alia natoon, halo barak liu no prepara aan di’ak, liuliu iha jestaun organizasaun hodi haree ba oin.
Nia reforsa, Estadu halo kumpre ninia devér, ninia obrigasaun kria oportunidade, maibé emprezáriu sira tenke aproveita oportunidade tanba mai dala ida de’it.
Governu Sei Tetu
Entretantu, iha fatin ketak, Ministru Reforma Lejizlativa Asuntu Parlamentár (MRLAP), Fidelis Magalhães hateten, prosesu komersiál entre Timor-Leste ho joint ventura sira sei iha faze kontinuasaun ba negosiasaun mina matan Greater Sunrise.
Timor-Leste sosa ona asaun ConocoPhillips tokon $350, maibé reprezentante ba asionista mak Timor GAP ep, ne’ebé koordena joint ventura sira oinsá negoseia no halo estudu viabilidade.
“Ita reprezentante asionista Timor GAP mak iha kompeténsia hamutuk Ministeriu Petroleu no Rekursu Minerais (MPRM) negoseia asaun ne’e”, dehan nia, iha edifísiu CNE, Kolmera, horisehik.
Fidelis dehan, maski Parlamentu Nasionál konkorda emprezáriu nasionál envolve sosa asaun ConocoPhillips, maibé parte Governu sei estuda bainhira foti desizaun ba kestaun ne’e, tanba prosesu negosiasaun kontinua la’o hela.
Parseiru atuál ba joint vantur Sunrise mak hanesan Woodside hanesan operadora ho partisipasaun 33,4%, ConocoPhillips 30%, Shell 26.6%, no Osaka Gás 10%.
