Husi totál delegadu 251 ne’ebé tuir kongresu ne’e aprezenta kandidatu rua Óscar Lima (lista A) no Claricia Lay (lista B). iha kompetisaun ne’e kandidatu rua ne’e hotu-hotu hetan apoiante kuaze ekilíbriu.
Nune’e, iha inisiu kontajen, votu Claricia nian sa’e makaas. To’o iha kontajen metade-de-votante Claricia superiór husi Óscar ho votu kuaze 20-resin. Maibé votu Óscar nian sa’e neineik bainhira atu remata kontajen votu.
Claricia ho Óscar konsege duni malu iha kontajen votu ikus nian, ne’ebé konsege hetan totál votu impatadu dala rua. Maski nune’e, to’o iha votu 103, votu Óscar nian hahú sa’e makaas hodi husi hela Claricia.
Bainhira votu Óscar nian konsege tama iha 126, apoiante sira simu kedas ho haklalak no basa liman. Tanba to’o iha númeru ne’e sai ona barrumetru ba kandidatu ida hodi bele manan iha eleisaun ne’e, husi totál votante 251.
Ikus mai termina ho vensedór ba Óscar Lima ho totál votu 136 no Claricia Lay ho votu 114 no mós votu nulu ida.
Ne’e duni, Óscar Lima re-eleitu iha Kongresu Nasionál CCI-TL ba dala III ho votu maioria nu’udar Prezidente CCI-TL ba períodu 2018-2022.
Iha ninia entrevista, Prezidente CCI-TL re-eleitu, Óscar Lima hateten, iha prosesu demokrasia iha lakon no manan. Sé de'it mak manan sei la lori grupu emprezáriu hotu ne’ebé hamahan-aan iha CCI-TL.
“Ha’u sei buka atu servisu hamutuk hodi organizasaun ne’e lori ba oin, tanba durante ne’e servisu barak mak tenta atu halo. Ne’e duni, organiza fila-fali presiza apoiu intelektuál husi munisípiu, fundadór no emprezáriu hotu”, dehan nia hafoin eleisaun, iha Salaun Novo Turismo, Sesta (14/10).
Hafoin asume hikas kargu Prezidente CCI-TL, Óscar Lima promete atu iha tempu badak dedika atensaun oinsá atu halo aprosimasaun governu hodi hetan apoiu no ho banku atu fó kréditu.
Nune’e, sei tau prioridade mós ba estrutura CCI-TL nivel munisipál hodi reorganiza atu oinsá governu lokál rekoñese sira nu’udar parseiru prinsipál.
Iha fatin hanesan, kandidatu Prezidente CCI-TL períodu 2018-2022, Claricia Lay, hateten, lakon ka manan ne’e buat ketak. Importante hanesan feto halo saida mak di'ak bele halo.
“Sente kontente tanba bele kompete ho mane sira iha sombriña boot ida ne’e, iha Kámara Komérsiu”, dehan nia.
Entretantu, nia mós enkoraja feto maluk sira hodi kontinua esforsu-aan bele dezenvolve nasaun ne’e liu husi setór privadu.
Deskontente ho Rezultadu Eleisaun
Entretantu, grupu balun husi fundadór no asosiasaun munisípiu balun deskontente ho prosesu Kongresu Nasionál CCI-TL ba dala III tanba konsidera la edukadu.
Portavós grupu, Franquelino da Costa Freitas, konsidera Kongresu Nasionál CCI-TL ba dala III ne’e mosu irregularidade. Maski nune’e, grupu ne’e rasik la esplika detalladamente irregularidade ne’ebé mosu.
Tuir planu sira sei mós halo karta ofisial ba órgaun soberanu sira hotu-hotu kona-ba sira ninia pozisaun ne’ebé sira foti relasiona ho kongresu ne’e.
