Prezidente CNE, Alcino Barris hatete, halo ona soru-mutu ho partidu polítiku hotu-hotu sira ida-idak hodi hatama relatóriu atividade kampaña Eleisaun Jerál Parlamentár no Eleisaun Antesipada nian.

Relatóriu ne’ebé sira hatama mai CNE ne’e maioria di’ak tebes, tanba ne’e hatama ona ba Governu atu bele halo ona prosesamentu ba direitu parpol sira nian.

Osan ne’ebé atu reembolsa ka selu votu ne’e mai husi osan subvensaun publika nian ne’ebé atu atende ba partidu sira.

Prosesu hotu-hotu hatama hotu ona ba Governu, tanba ne’e espera tempu besik Konsellu Ministru bele aprova osan ne’e hodi bele transfere ba parpol ida-idak nia konta bankária.

Alcino hatete, agora sei problema uitoan maka partidu koligasaun balun seidauk entende malu atu governu transfere osan tama ba iha partidu ne’ebé nia-konta bankária. Tanba ne’e, husu sira atu rezolve uluk molok desizaun.

Parpol ne’ebé avansa mesak ho nia-bandeira ka koligasaun sira sei iha direitu atu simu osan dala rua husi Eleisaun Parlamentár 2017 no Eleisaun Antesipada 2018 nian.

“Dekretu governu ne’ebé aprova iha 2017 ne’e kada votu governu sei selu $4, tanba ne’e ita sei kontinua ho ida ne’e”, dehan nia, iha Uma Fukun PN, horisehik.

Nia hatete, iha Eleisaun Parlamentár 2017 parpol ne’ebé ho nia-bandeira rasik no koligasaun ida-idak soma nia votu hamutuk hira, depois multiplika ba rua iha ne'ebá bele justifika ona sira nia osan rasik.

Tanba ne’e, iha eleisaun dala rua ne’e partidu ida ne’ebé nia votu barak nia mak sei hetan osan barak husi subvensaun públiku.

Iha Eleisaun Parlamentár 2017 nian partidu 21 mak konkorre no iha Eleisaun Antesipada iha partidu haat lori nia bandeira rasik no haat koligasaun, tanba ne’e husi osan subvensaun publika ne’ebé atu selu votu besik tokon $2.