Totál orsamentu ne’e, SEKomS sei fó apoiu de’it ba média privadu sira hanesan média imprime, eletrónika no radio komunidade sira atu dezamina informasaun ba públiku ho kualidade.
Sekretáriu Estadu Komunikasaun Sosiál, Mericio Akara informa katak. Iha OJE 2018 ne’e Governu liu husi SEKOMS preve montante Orsamentu Rihun $50 ba instituisaun média hotu inklui radio komunidade sira.
Nia dehan, SEKomS mós kontinua apoia média privadu ho média nasionál sira oinsá desimina informasaun atividade Governu sira liu husi públisidade no programa Governu nian.
“Iha Orsamentu 2018 ne’e ita prevee osan rihun $50 ba média privadu nasionál, nune’e iha OJE 2019 espera aprova mak ita hasa’e tan montante orsamentu ba média sira,” dehan Akara ba Jornalista iha Palasiu Governu Dili, Tersa (9/10).
Nia dehan, Orsamentu Rihun $50 ne’ebé mak SEKoMS apoia ba instituisaun média privadu ho média nasionál inklui Radio komunidade sira bazeia ba programa no proposta sira ne’ebé média sira hato’o ba Governu.
OJE 2018 Governu aloka halo pagamentu ba Dívida sira ne’ebé tula ba oitavu Governu nia leten. Iha OJE 2019, SEKomS sei halo planu orsamentu oinsá hasa’e kustu orsamentu média sira iha rai laran.
Iha oportunidade ne’e, Governante ne’e mós haktuir katak, 2019 SEKoms sei koordena ho fundu Dezenvolvimentu Kapitál umanu (FDCH) hodi apoia orsamentu ba SEKOMS nune’e hasa’e kapasitasaun no formasaun ba jornalista nune’e iha koñesimentu kle’an iha área jornalizmu.
