Pagamentu ba dívida projetu 142 importante atu bele aselera lalais hodi ble fó naha todan ba OJE 2019 nian.

Diretór Jerál Finansas-do- Estadu, Januário Gama hateten, ba tinan 2018 husu ministériu sira atu konsentrasaun ba OJE 2018 atu selu selu lalais despeza sira hanesan kombustivel, infraestrutura, no manutensaun hodi labele hatodan fali tinan fiskál ba tinan 2019.

“Ministériu no instituisaun sira, liuliu ajénsia dezenvolvimentu nasionál halo verifikasaun no konfirmasaun ba progresu projetu sira ninian. Nune'e rekomendasaun mai ministériu finansas atu halo pagamentu”, dehan nia, iha edifísiu Ministériu Finansas, Ai-Tarak Laran, foin lalais ne’e.

Ne’e duni, Ministériu Finansas fó orientasaun ba ministériu sira, alende sira prepara OJE tinan fiskál 2019, konsentra mós ba orsamentu tinan 2018 hodi selu despeza imediatu balun tenke realiza iha tinan ne’e.

Nia dehan, dívida ba kombustivel, manutensaun, infraestrutura ne’e aloka iha órgaun Estadu sira atu fó atensaun, nune’e labele lori ba fali despeza sira ne’e ba hatodan fali OJE tinan fiskál 2019 nian.

Januário dehan, presiza konsentra hodi ezekuta Orsamentu Jerál Estadu ho kualidade, la’ós haree ba nia persentajen, maibé ezekusaun ne'ebé fó efeitu duni ba ba orsamentu ne’e rasik.

Kona-ba ezekusaun iha esperiénsia sira liu ba hatudu ona katak to’o períodu ida ikus bele ezekuta de’it to’o persentajen 85%. Ne’e signifika, sira tuir mai tenke fundamentu di'ak liután planeamentu depozita ho kapasidade atu ezekuta osan ne’e tuir alvu.

Entretantu, atu atu konfirma kona-ba orsamentu hirak mak atu selu despeza hirak ne’e, diretór jerál ne’e rasik lakohi fó sai tanba kestaun tékniku.