Sekretáriu Estadu Komunikasaun Sosiál (SEKomS), Juvinal Mericio Akara hateten, semana kotuk kada liña ministeriál hatama ona proposta orsamentu ba komisaun G PN hodi diskute.

Ne’e duni, Governu Governu propoin biliaun $1.2 ba OJE 2018, ne’ebé lidera husi Xefe Governu, Taur Matan Ruak hamutuk membru Governu tomak preparadu hahú diskute.

“Ita husu ba deputadu sira nia kolaborasaun, nune’e ami prontu ona hakat ba Parlamentu Nasionál”, dehan nia, iha Palásiu Governu, horisehik.

Tuir nia, deputadu sira presiza koopera ho Governu, nune’e OJE 2018 ne’e hetan aprovasaun hodi bele selu dívida sira ne’ebé Governu anteriór husik hela.

Alende ne’e, OJE 2018 mós sei funsiona mákina estadu durante fulan haat, no mós pagamentu ba saláriu no vensimentu ho transferénsia publika ba veteranu ho idozu to’o oras ne’e sidauk hetan subsídiu husi Governu.

Ne’e duni, Governu husu ba Xefe Estadu ho deputadu opozisaun sira iha PN tenke kolabora ho Governu bele rezolve lalais problema ne’ebé seidauk rezolvidu.

Entretantu, Forum Organizasaun naun Governamentál Timor-Leste (FONGTIL), espera iha tempu badak Parlamentu Nasionál mós aprova no hetan promulgasaun husi Prezidente Repúblika.

Diretór Ezekutivu FONGTIL, Daniel Santos do Carmo hateten, atu bele solusiona situasaun sósiu-ekonómiku situasaun ne’e presiza intervensaun husi Estadu nian liu husi OJE.

Maski orsamentu ne’e barak selu dívida, maibé iha esperansa atu tau mós atensaun ba iha prioridade ba setór Edukasaun no Saúde.

“FONGTIL la servisu defende kompañia nia direitu FONGTIL servisu atu defende sosiedade tomak inklui ita ninia kompañia sira ita nia emprezáriu sira”, tenik nia.

PNTL Garante Seguransa

Polisia Nasionál Timor-Leste (PNTL) sei garantia seguransa to’o debate remata tuir tempu determinadu.

Inspetór Polisia Apoiu Seguransa ba Gabinete Prezidénsia Parlamentu Nasionál, Alexandre da Costa ‘Samurai’ hateten, PNTL ne’ebé estakadu iha PN atu fó apoiu seguransa ba órgaun soberania iha tempu saida de’it .

Iha debate OJE ne’e ema barak sei marka audiénsia, tanba ne’e ami sei halo pasa revista ba sira ne’ebé hakarak mai asiste direita iha plenária.

Objetivu husi pasa revista ne’e atu prevene ema labele lori sasán kro’at ne’ebé iha tendénsia atu hamosu krime ruma. Alende ne’e, ba públiku sira ne’ebé tama mai iha arredores PN nian tenke hatais formál.

Prosesu hirak ne’e sai hanesan regulamentu kuandu sidadaun sira mai la tuir rejimentu ami sei la autoriza atu tama mai.

“Ami sei garante seguransa ba debate OJE to’o remata iha loron 7 Setembru” dehan nia, iha Uma Fukun PN, horisehik.

Durante debate iha jeneralidade, espesialidade no votasaun finál globál, sei hetan apoiu másimu husi Komandu Jerál PNTL, liu husi Unidade Espesiál Polisia (UEP) ne’e sei destaka iha arredores PN nian no Unidade Tránzitu sei apoiu iha li'ur hodi haree ba movimentasaun transporte públiku.

Alende ne’e ba númeru efetivu husi UEP ne’ebé atu apoiu hodi fó seguransa mai PN durante debate OJE labele fó sai maibé ne’e konforme orientasaun komandu.