Empreza na’in tolu koordena ona ho BNCTL hodi diskute naran ba banku ne’e sei hanaran “3A Timor S.A.”.

Tuir karta komunikadu ne’ebé INDEPENDENTE asesu haktuir katak, ekipa BNCTL no empreza na’in tolu diskute ona kritériu hotu kona-ba harii banku no banku ne’e sei harii nia sede iha Dili.

“Investidór no fundadór banku nian mós oras ne'e daudaun iha ona grupu sosiedade Timorense nian ho naran 3A Timor S.A, ne’ebé sai parte husi grupu sosiedade internasionál nian, iha ne’ebé  hakarak valoriza husi nia investidór no fundadór  banku nian durante liu tinan sanulu (10) iha Ázia-Arábica-África,” dehan empreza internasionál na’in tolu iha komunikadu Imprensa.

Ligasaun forte setór públiku ho privadu, ne’ebé investidór sira hetan iha rejiaun 3, refere ona atu hili naran 3A. 

Tuir  fundadór banku 3A Timor, SA sira mai atu harii  banku ida atu haforsa setór finanseiru ho setór banku nian iha TL, no mós atu bele opera iha nivel internasionál, no kanaliza kapitál investimentu nian.

Investidór hirak ne’e  mai halo proposta  atu hetan kapitál ne’ebé disponivel iha zona globál, kanaliza mós ba projetu investimentu iha TL  ho ninian objetivu balu hanesan atu oferese   taxa de juru ne’ebé ki'ik liu ba emprezáriu ne’ebé hakarak atu dezenvolve ninia atividade  iha TL no populasaun tomak.

Sira sei fó asesu ba servisu bankáriu nian ne’ebé daudaun ne’e banku seluk iha TL seidauk bele fornese ba emprega no ema Timoroan sira.

Kontrola ninia operasaun tuir objetivu Dezenvolvimentu Sustentavel ne’ebé define husi Konferénsia dala rua nulu resin ida husi Nasoes Unidas kona-ba alterasaun klimátikas (COP 21) iha Paris no husi konferénsia (COP 22) iha Maraquexe.

Loke ninia atuasaun no aproveita potensiál ne’ebé boot husi relasaun estratéjika Timor nian ho nasaun sira seluk, katak pertense iha CPLP no G7+ hanesan mós ligasaun ekonómika ho nasaun membru ASEAN no komunidade sul Pasífiku.

Tanba ne’e, Governu liu husi Ministériu Planeamentu Investimentu Estratéjiku (MPIE), akompaña prosesu importante ba investimentu estranjeiru ba TL ida ne’e.

Ministru MPIE Xanana Gusmão konsidera fundamentál ba dezenvolvimentu no fortalesementu ekonomia empreza nasionál, katak TL tenke iha setór banku ne’ebé kompetitivu, iha kapasidade atu apoia di’ak liu empreza ki'ik no boot, ne’ebé buka solusaun finanseira ba sira nia negósiu.

Pretende mós atu bele fó posibilidade ba Timoroan asesu ba kondisaun banku nian atu sira bele loke sira nian primeiru negósiu no hadi'a sira nia kondisaun moris loron-loron.