Tuir Xefe Koordenadór Projetu ADB,Josè Pereira apoiu ne’e sira oferese, tanba halo ona estudu ba munisípiu 4 komesa iha 2014 too 2015.
Ho apoiu ne’e, ADB hakarak ajuda povu bele hetan asesu ba bee moos no fasil atu kuru bee ho distánsia besik.
“Orsamentu totál ba ba planu mestre ne’e hamutuk kuaze besik rihun $850 ba munisípiu haat,”dehan José ba jornalista iha Restaurante Tower Bar Fatuhada Dili, Tersa (7/03).
ADB hala’o servisu bazeia ba pedidu husi governu, bainhira governu husu sira prontu atu servisu hamutuk hadi'a dezenvolvimentu fornese bee moos ba povu.
Programa fornese bee moos ne’e sei implementa iha kapitál munisípiu hosi servisu hamutuk ho Ministériu Obras Públiku Transporte no Telekomunikasaun.
Durante ne’e, ADB fó ona apoiu dada bee moos ba povu sira iha Munisípiu Manatutu, Oekusi ho totál família uma kain rihun 7 maka asesu ba bee moos durante oras 24.
ADB mós husu kontribuisaun ba komunidade atu kuidadu fasilidade bee moos no kada fulan povu tenke selu hodi halo manutensaun ba bee moos dura ba tempu naruk.
Ba fatin sira ne’ebé ADB fasilita ona bee moos, ADB koordena ho kompañia internasionál no SAS hala’o nafatin manutensaun.
Iha fatin hanesan, Vice Ministru MOPTK Januário Pereira hato’o agradese ba apoiu ADB hodi fornese bee moos ba povu munisípiu haat.
“Ami mós preokupa no ami hatene katak, ita ho tempu ikus ne’e tanba fenomena liña ne’ebé mosu halo fatin balun bee matan too maran,” tenik Januário.
Nia dehan,fonte bee nian karik bee matan sira ne’ebé iha mak bee la iha bele buka fali be matan seluk se hodi fura para fornese bee moos ba povu.
Nia hatutan, governu halo nafatin esforsu makas atu servisu ho ADB, JICA no Ajénsia internasionál seluk fornese nafatin bee moos tuir planu dezenvolvimentu nasionál.
